Ցավալի իրավիճակ է, քննարկման արդյունքները գոհացուցիչ չեն. Փաշինյանը՝ Լաչինի միջանցքի մասին

Գիտեք, որ 2022 թվականն ընդգծվեց ՀՀ-ի նկատմամբ ագրեսիայով: Պետք է ասեմ, որ տարածաշրջանում ռազմաքաղաքական իրադրությունը շարունակում է մնալ բավականին լարված: Ընդ որում, դա կապված է ոչ միայն մեր ունեցած բարդ հարաբերությունների, այլ նաև տեղի ունեցող գլոբալ փոփոխությունների, Ռուսաստան-Ուկրաինա հարաբերությունների հետ: Այս մասին այսօր ասաց Նիկոլ Փաշինյանը՝ անդրադառնալով տարածաշրջանային իրադարձություններին:

Նրա խոսքով՝ հիմա տագնապալի լուրեր են ստացվել նաև Իրան-Աֆղանստան հարաբերությունների վերաբերյալ: 

«Մեր խնդիրը հետևյալն է: Գիտեք, որ մենք որդեգրել ենք խաղաղության օրակարգ, խաղաղության ռազմավարություն: Մենք անում ենք հնարավորը՝ այդ օրակարգը կյանքի կոչելու համար: Տեղյակ եք, որ ընդամենը նախորդ շաբաթ Մոսկվայում տեղի ունեցավ Հայաստան-Ադրբեջան-Ռուսաստան եռակողմ ձևաչափով հանդիպման հերթական փուլը: Ես պետք է տեղեկացնեմ, որ քննարկման թեմաներից մեկը կապված էր ԼՂ-ում հաստատված հումանիտար իրավիճակի, ինչպես նաև Լաչինի միջանցքի ապօրինի փակման հետ: Եվ այս թեման մենք քննարկել ենք ՌԴ-ի մեր գործընկերների հետ: Ես չեմ կարող ասել, որ այդ քննարկման արդյունքները գոհացնում են: Պիտի արձանագրենք, որ սա շատ ցավալի իրավիճակ է: Ես նաև հրապարակային առիթ ունեցա ասելու, որ Լաչինի միջանցքի փակումը տեղի ունեցել ՌԴ խաղաղապահների աչքի առաջ և ներկայությամբ, ինչը մտահոգիչ է: Մենք շարունակելու ենք մեր քննարկումները մեր ՌԴ գործընկերների հետ, որպեսզի կարգավորենք այս իրադրությունը»,- նշեց Փաշինյանը: