Կաթոցք չի, սելավի ջուր ա, թաս չենք դնում տակը` լողանալու տաշտ ենք դնում. վանաձորցիներ. (տեսանյութ)

Վանաձորի հանրակացարաններում բնակվող քաղաքացիները մտահոգված են` «տանիքը գլխներին փուլ է գալիս»:

Ավելի քան 10 տարի առաջ Վանաձորի քաղաքապետարանը որոշում կայացրեց քաղաքը մաքրել տնակային ավաններից:
Այն, որ 1988 թվականի երկրաշարժից հետո հայտնված ժամանակավոր կացարաններն արդեն ապրել էին իրենց դարը և տնակների ապամոնտաժման կարիք կար` չի քննարկվում, սակայն հարկ է նկատել, որ երկրաշարժի հետևանքով դրսում հայտնված բնակիչներին քաղաքապետարանն այլընտրանք չուներ առաջարկելու, քան ժամանակին ուսանողների համար կառուցված հանրակացարաններ, որոնք երկրաշարժից հետո հիմնանորագման կարիք ունեին:

Աչք կապելու համար քաղաքապետարանը կոսմետիկ վերանորոգումներ արեց և մարդկանց բնակեցրեց այդ շենքերում:
Սակայն շատ չանցած` խնդիրներն իրենց զգացնել տվեցին:

Վանաձորի «Պրոֆ-տեխ ուսումնարան»-ի նախկին շենքում, կամ ինչպես ասում են` «Ուսանողական 90»-ում, այսօր ապրում է 36 բնակիչ, սակայն գրանցված է 55-ը: Ոչ կոմունալ հարմարությունները ու ոչ էլ շենքային պայմանները մխիթարելի չեն:

Նախկին տնակների բնակիչներն, ովքեր այսօր արդեն հանրակացարանում են` երանի են տալիս իրենց տնակային պայմաններին:
«Իմ տնակը հազար հատ էս քարաշեն շենքն արժի: Ամեն ինչ մի քանի քառակուսու վրա: Տեղը փոքր, չես հասկանում կուխնի ա, ննջասենյակ թե բաղնիք: 2 ընտանիքին մի սանհանգույց է բաժին ընկնում, առավոտից քանի անգամ գնացել եմ անընդհատ զբաղված է, ում կարող ես ասել սա իմն է, ինչքան իրավունք ես ունեմ, էնքան էլ նա»,-newspess.am-ի հետ զրույցում ասաց հանրակացարանի բնակչուհիներից Լիլիթ Ստեփանյանը:

Բնակիչներից մեկն էլ նկատեց, որ աշխատում են մասնակի վերանորոգումներով` մի կերպ պահել բնակարանի տեսքը, սակայն անբարեկարգ տանիքի հետևանքով անձրևից ու ձյան հալոցքներից առաստաղը փլուզվում է:

«Ձյունն իմ տան մեջ ա հալվում, էլ ոնց ասեմ: Կաթոցք չի, սելավի ջուր ա, թաս չենք դնում տակը` լողանալու տաշտ ենք դնում…»,- վրդովված պատմում ու չէր հանգստանում մեր զրուցակիցը:

Նախորդ տարվա աշնանը` բազմաթիվ բողոքներից հետո, տանիքի ու սանհանգույցների խողովակների վերանորոգման աշխատանքներ են կատարվել: Քաղաքապետարանից ասել են, թե այս աշխատանքերի վրա ծախսվել է 2 մլն 700 հազար դրամ:
Սակայն, հաշվի առնելով այն, որ վիճակը չի բարելավվել, կարելի է ասել, որ գումարները մսխվել են:
Թե ում գրպանն են լցվել, խիստ երևակայություն պետք չէ ունենալ:

Քաղաքապետարանի համատիրության և բնակարանային տնտեսության բաժնի պետ Գրիշա Պառավյանը, nerwspress.am-ի մարզային թղթակցին հրաժարվել է հարցազրույց տալ` պատճառաբանելով, թե ղեկավարությունը տեղյակ չէ, նշելով, թե միայն գումարների մասին չպետք է խոսել,  պետք է աշխատանքները տեսնել, որի շուրջ առաջիկայում քննարկումներ են լինելու:

Հետաքրքիր է` ինչ է քննարկելու քաղաքապետարանը, երբ կա ծախսված զգալի գումար, իսկ կատարաված աշխատանքերը տեսանելի չեն:

Մանրամասները` տեսանյութում