Պարոն Փաշինյանն ասում էր՝ 3 մլն վարչապետով պիտի որոշում կայացնենք, բայց ո՞ւր ա, ընդամենը մի հոգի որոշում ա կայացնում՝ կաբինետում նստած. բողոքի ակցիայի մասնակից վարորդ

Մեքենաների կողային ապակիների մասով մենք անհամաձայնություն ունենք, քանի որ ապրում ենք շատ շոգ երկրում: Այս մասին այսօր ասաց մեքենաների թափանցելիությունը մինչև 70 տոկոս բարձրացնելու դեմ բողոքի ակցիա անող վարորդներից մեկը: 

«Պլյոնկաները պոկած վարելով՝ վառվում ենք ահավոր»,- ասաց վարորդը, այլ օրինակ բերելով, որ եթե, ասենք, գիշերը հետևից ընթացող մեքենան միացրեց հեռահար լույսերը, ապա դա ընկնելու է դիմացից ընթացող մեքենայի վարորդի աչքերի մեջ, ինչը խնդիր է առաջացնում, կամ կողքից ընթացող մեքենա եղավ, խնդիր է, իսկ ցերեկն արևն է խանգարում: 

«Այստեղ կլիման ուրիշ է, ուրիշ երկրներում՝ ուրիշ: Եթե համեմատում են Ռուսաստանի կամ Վրաստանի հետ, ապա այստեղ կլիման ուրիշ է, այնտեղ՝ ուրիշ: Այստեղ կանգնում ես արևի տակ, կարմիր ես դառնում, ասենք, սև մայկան կարմիր է դառնում»,- ասաց ակցիային միացած վարորդը: 

Նրա կարծիքով՝ լուսաթափանցելիության բարձր աստիճանը կարող է նաև գողությունների թվի ավելացման բերել: Նա իր օրինակով նշեց, որ ինքը DJ է և իր մեքենայում մասնագիտական գործիքներ են լինում:

«Եթե ես հիմա պլյոնկան պոկեմ, ցերեկով կանգնեմ մի տեղ, մեկը տեսնի, ջարդի, տանի, ինձ ո՞վ է դրա համար փոխհատուցելու՝ ոչ մեկ: Պարեկները, որ ասում են՝ իրենք ցանկանում են պոկել, քանի որ չեն տեսնում գիշերով վարորդը գոտի կապել է, թե հեռախոսով է խոսում, թե ոչ, ապա ես կարող եմ ապացուցել, որ դիմացից լավ էլ երևում է. Էդ ուղղակի պատրվակ ա ժողովրդին տուգանելու: Պարոն Փաշինյանը 2018 թվին, որ ընտրվեց, ասում էր՝ Հայաստանում գոյություն ունի 3 մլն վարչապետ, ու մենք 3 մլն վարչապետով պիտի որոշում կայացնեինք: Բայց ո՞ւր ա: Ընդամենը մի հոգի հելնում, որոշում ա կայացնում՝ կաբինետում նստած, ինչ-որ բան ա սեղմում, ինքն էլ մեքենայի հետևը նստած, կոնդիցիոները միացրած հով-հով ման ա գալիս, չի մտածում, որ լիքը վարորդներ կան, որ առավոտից իրիկուն տաքսի են քշում: Մարդը, ասենք, ալերգիա ունի, ո՞նց քշի: Հիմա ի՞նչ, թազա օրենք հանեն, որ ով արևի տակ երկար չի կարում կանգնի, վարորդական իրավունք չստանա՞»:

Հիշեցնենք, որ ներպետական օրենսդրության իրավադրույթների և Մաքսային միության տեխնիկական կանոնակարգի համաձայն՝ մեքենաների առջևի կողային ապակիների լուսաթափանցելիությունը պետք է կազմի առնվազն 70 %: