«Երևան Ջուր» ընկերության տնօրենի «Լենդ Կռաուզերը», միլիոնանոց աշխատավարձն ու ներդրումների «փուչիկը»

Այս տարի մայիսին պետք է մրցույթ հայտարարվեր` Երևանի և հարակից համայնքների ջրամատակարարման ու ջրահեռացման համակարգերը կառավարելու համար, սակայն ինչպես երևում է, մրցույթը հետաձգվում է:

Թե ինչ պատճառով է մրցույթը հետաձգվում, «Երևան Ջրից» մեզ հաջողվեց  պարզել միայն, որ բարդ մրցույթ է կառավարությունը դժվարանում է այդ մրցույթը կազմակերպել:

Մեր բազմաթիվ փորձերը կապվել անմիջապես «Երևան Ջուր» ընկերության տնօրեն Գոռ Գրիգորյանի հետ` չհաջողվեց, քանի որ նույնիսկ ըստ մամուլի քարտուղարի, ինքն էլ է ուշ-ուշ տեսնում իր ղեկավարին, նա քիչ է լինում աշխատավայրում:

Աշխատավայրում քիչ ժամանակ անցկացնող տնօրեն Գոռ Գրիգորյանը, ըստ որոշ լուրերի, պարզվում է, վարում է ծառայողական 50 000 դոլար և ավելի արժողությամբ «Լենդ Կռաուզեր» ավտոմեքենա, ստանում է ամսական մոտ 3 մլն դրամ աշխատավարձ:

Ըստ շրջանառվող լուրերի, ամսական 3 մլն դրամ աշխատավարձ ստացող Գոռ Գրիգորյանը վայելում է Երևանի փոխքաղաքապետ Կամո Արեյանի հովանավորությունը: Զուգադիպություն է, թե ոչ, բայց «Երևան Ջուր» ընկերության տեխնիկական աուդիտի հաշվետվության արդյունքները մշտապես ընդունվել են Երևանի փոխքաղաքապետ Կամո Արեյանի ներկայությամբ:

Կամո Արեյանն էլ, որպես կանոն, լուրջ ձեռքբերում է գնահատում ընկերության կառավարման, ֆինանսատնտեսական, ջրամատակարարման որակի բարելավման, ջրակորուստների կրճատման աշխատանքները:

Ինչ արդյունքներ է գրանցել Veolia Water ընկերությունը, հատկապես այն պարագայում, որ կառավարումը լիովին վստահել է հայկական թիմին:
Միայն մեկ օրինակ. 2011թ. հունիսի 1-3-ը, Երևան քաղաքի Նուբարաշեն 11-րդ թաղամասում խմելու ջրից զանգվածային թունավորման դեպք գրանցվեց:

Իսկ Երևանում և մերձակա համայնքներում տարածքներ կան, որ ոչ խմելաջրի որակն է բարձրացել, ոչ էլ ջրամատակարարման տևողությունն է երկարել, և եթե որևէ խողովակաշար են անցկացրել, ապա հաջորդն օրն իսկ սկսել են նորոգել ու վերանորոգել:

Մեզ չհաջողվեց անմիջապես տնօրենից պարզել, թե որքան շահույթ է ստանում «Երևան Ջուր» ընկերությունը, այն պարագայում, երբ գրեթե ամեն տարի դիմում է խմելաջրի սակագինը բարձրացնելու հայտով: Իսկ եթե փոքր-ինչ ջանք ու գումար դրվեր ընկերության կողմից և կորուստները նվազեցվեր, սպառողն այսօր խմելու ջրի դիմաց բոլորովին այլ սակագին կվճարեր, ջրի որակն էլ այլ կլիներ: Բայց «Երևան Ջուր» քաղաքականությունն այլ է, այստեղ սիրում են ճոխ աշխատավարձ, շքեղ մեքենաներ, փարիզյան թանկարժեք ճանապարհորդություններ:

Պարզվում է, որ այս ընկերությունում «Լենդ Կռաուզեռ» մակնիշի մոտ 50 000 դոլարանոց ավտոմեքենա է վարում նաև ընկերության ֆինանսական գծով պատասխանատուն, որին ընկերությունում փաղաքշորեն «Պապիկ» են ասում: Նա ամենաերկարակյաց աշխատողն է, քանի որ «Երևան Ջրում» է 1994թ-ից:

Ասում են, որ հերթական մրցույթում ով հաղթի, միևնույնն է ֆինանսիստ «Պապիկը» մնալու է, փոխարենը Կամո Արեյանի հովանավորյալ Գոռ Գրիգորյանը կլքի իր պաշտոնը:

Ըստ շրջանառվող լուրերի, մրցույթին ցանկանում են մասնակցել «Արարատ գրուպը», Կարեն Կարապետյանի «Էյ-Ի-Ջի Սերվիսը», Ֆրանսիական Veolia Water ընկերությունը, ՀԷՑ-ի սեփականատեր Սամվել Կարապետյանը: