Եթե Փաշինյանը մնաց, Տիգրանաշենին սպասվում է Շուռնուխի ճակատագիրը ու ավելի վատ․ Արթուր Խաչատրյան

«Եթե Նիկոլ Փաշինյանը մնա իշխանության և շարունակի այն քաղաքականությունը, որ այսօր է իրականացնում, ապա Տիգրանաշենին սպասվում է նույն ճակատագիրը, ինչ Շուռնուխինն է, բայց շատ ավելի վատ»։ Այս մասին Ազգային ժողովում լրագրողների հետ զրույցում ասաց «Հայաստան» խմբակցության պատգամավոր Արթուր Խաչատրյանը՝ անդրադառնալով այսպես կոչված անկլավների հանձնման մասին Նիկոլ Փաշինյանի հայտարարությանը։

«Ինչո՞ւ է Փաշինյանն առաջ քաշում հենց 1975 թվականի քարտեզը, այլ ոչ թե 1920-ականների։ Հասկանալի չէ։ Չնայած հասկանալի է՝ Ադրբեջանն այդպես է ուզում, այդպես է անում»,- ասաց պատգամավորը։

Նրա խոսքով՝ 1975 թվականի քարտեզով, օրինակ, Գորիս-Կապան ճանապարհն 100 տոկոսով անցնում էր Հայաստանի տարածքով. «Հիմա, եթե իրենք 1975 թվականի քարտեզն են ընդունում, ինչո՞ւ այդպես հապշտապ տարածքը զիջեցին Ադրբեջանին։ Ասում էինք՝ քանի սահմանազատված ու սահմանագծված չէ, ինչո՞ւ ես դու տարածք հանձնում»։

Ինչ վերաբերում է Տիգրանաշենին, ապա Արթուր Խաչատրյանը նկատում է, որ այնտեղ մարդիկ են ապրել, տուն են ստացել, հարկ են վճարել, ընտրությունների են մասնակցել։

«Եթե ինքը (Փաշինյանը խմբ․) ուզում է ՀՀ-ի տարածքից որևէ մաս զիջի, ապա դա պետք է տեղի ունենա հանրաքվեով, ինչը պահանջում է ՀՀ օրենսդրությունը։ Հիշեցնեմ, որ երբ Շուռնուխը տվեցին, փոխարենն առաջարկեցին ճանապարհ, որը քանդվեց 3 ամիս հետո։ Բյուջեի կատարողականի ժամանակ Տարածքային կառավարման և ենթակառուցվածքների նախարարն ասաց, որ այդ ճանապարհը նախատեսված չի եղել միջպետական բեռնափոխադրումների և ուղևորափոխադրումների համար, ինչի պատճառով պրոբլեմներ են առաջացել։ Այլընտրանքային ճանապարհը Տիգրանաշենով անցնող, ինքը հավանաբար Ուրցաձորի ճանապարհը նկատի ուներ։ Ուրցաձորի ճանապարհը ևս նախատեսված չէ, որովհետև եթե դուք լանջարով շեղվեք և իջնեք, ապա կտեսնեք, որ դա էլի ֆուռերի համար նախատեսված չէ»,- նշեց Խաչատրյանը։