«Որևէ մեկն այս խնդրով չի զանգահարել և չի դիմել ինձ». Ռուբեն Մելիքյանը՝ Աշոտի մասնակցությամբ միջադեպի մասին

Ֆեյսբուքյան օգտատերերից մեկը երեկ՝ հունիսի 6-ի ուշ երեկոյան գրել էր, որ Երևանի մետրոյում միջադեպ է տեղի ունեցել՝ Աշոտ Փաշինյանի մասնակցությամբ:

Մասնավորապես, նշվում էր այն մասին, որ քաղաքացիներից մեկն ապտակել է Աշոտ Փաշինյանին:

Արձագանքելով օգտատիրոջ գրառմանը՝ իրավապաշտպան Ռուբեն Մելիքյանը գրել էր, որ եթե նման դեպք տեղի է ունեցել, ապա Աշոտին ապտակած քաղաքացուն մենակ չի թողնի:

Իսկ դրանից մեկ ժամ անց էլ արդեն ներկայացել էր լայվով, որտեղ տեղեկացնում էր, որ նման միջադեպ չի արձանագրվել, իսկ եթե տեղեկություններ լինեն՝ կհաղորդի:

Արդեն այսօր՝ հունիսի 7-ին, NEWSPRESS.am-ը փորձեց ճշտել՝ ինչ նոր տեղեկություններ կան միջադեպի վերաբերյալ:

Մեզ հետ զրույցում Ռուբեն Մելիքյանը նշեց, որ ստույգ տեղեկատվություն կա, որ երեկվա դրությամբ նոր բան չի արձանագրվել: Նա փաստեց, որ Աշոտ Փաշինյանը երեկ օգտվել է մետրոյից, սակայն նրա հետ տեղի ունեցած որևէ միջադեպ չի արձանագրվել:

«Կարող ենք որպես փաստ արձանագրել, որ Աշոտ Փաշինյանն ուշ ժամի օգտվել է մետրոյից և կարող ենք փաստ արձանագրել, որ որևէ մեկը բերման չի ենթարկվել: Մնացածը հնարավոր է քաղաքացիների զրույցներ են»,- ասաց իրավապաշտպանը:

Նա նշեց նաև, որ խնդրով պատգամավորներ են հետաքրքվել, սակայն բերման ենթարկվելու մասին իրենց մոտ որևէ տեղեկություն չկա:

«Որևէ մեկն այս խնդրով չի զանգահարել և չի դիմել ինձ»,- ասաց իրավապաշտպանը՝ հավելելով, որ հնարավոր է տեղեկությունն այնքան էլ հավաստի չէր:

Արմինե Մկրտումյան