Իշխանությունը լկտի է լինում այնքան, որքան թույլ է տալիս ժողովուրդը․ Սարգիս Ավետիսյան

Իշխանությունների լկտիությունը հասել է նրան, որ նրանք չեն ուզում ոչ մի հարցի պատասխանել: Առաջ գոնե ինչ-որ բաներ փորձում էին պատասխանել, հիմա՝ հարկ չեն համարում։ Այս մասին ասուլիսի ժամանակ ասաց  «Համերաշխություն» շարժման համակարգող Սարգիս Ավետիսյանը։

«Ասում էին մեզ մանդատ եք տվել, մենք էլ անում ենք, հիմա ասում են՝ լավ ենք անում, էսպես ենք ուզում, ու անում ենք»,-նկատում է Ավետիսյանը։

Նա իրավիճակը լուրջ է գնահատում, ու խնդրի լուծումը տեսնում է ոչ թե քաղաքական, այլ ազատագրական պայքարի մեջ։ Սարգիս Ավետիսյանի գնահատմամբ, բոլոր ազգերը փորձում են այս իշխանության օրոք իրենց շահեկան պատառներն ստանալ Հայաստանից։

«Այն, որ սա խայտառակություն է՝ գիտենք։ Այն որ սա սահման չունի՝ դա էլ գիտենք, բայց մեզ պետք չէ, որ Թուրքիայի հետ խաղաղության գինը լինի Հայոց Ցեղասպանության ուրացումը, իսկ ադրբեջանցիների հետ՝ Արցախի կորուստը»,-ասում է Ավետիսյանը։

Նա նկատում է, որ այս ամենը դեռ վերջը չի։

«Ավելի վատ բաների ենք ականատես լինելու, եթե այս ամենի դեմը չառնենք։ Իշխանությունը լկտի է լինում այնքան, որքան թույլ է տալիս ժողովուրդը։ Հենց մենք դրա դեմն առնենք՝ իրենք այլևս այդքան լկտի չեն լինի, իսկ հիմա մտածում են ամեն ինչ կարել է»,-ընդգծեց Ավետիսյանը։