Որևէ գործառույթ մեր կողմից չենք տեսնում. Քերոբյանը՝ կարկուտից տուժածների մասին (տեսանյութ)

Գյուղերը տուժել են վերջերս տեղացած կարկուտից։ Շատ վայրերում էր եղել գյուղատնտեսության նախարարությունը, բայց վնասի չափը չի հաշվարկել: Ազգային ժողովում այս մասին հիշեցրեց  «Հայաստան» խմբակցության պատգամավոր Գառնիկ Դանիելյանը՝ դիմելով ՀՀ Էկոնոմիկայի նախարար Վահան Քերոբյանին։

Պատգամավորը նկատեց, որ նման իրավիճակում հայտնվելով՝ գյուղացիները չեն կարողանում կատարել վարկային պարտավորությունները:

Քերոբյանը նշեց, որ գյուղացիները, ովքեր ապահովագրում են բերքը, նման դեպքերում ինչ-որ չափով սուբսիդավորվում են, բայց դրանից ավելին չեն կարող անել:

«Այդ ամենը պետք է ապահովագրական ընկերություններն անեն, իսկ եթե գյուղացին որոշել է չապահովագրել՝ դա իրենց ռիսկն է և մենք էստեղ լրացուցիչ որևէ գործառույթ մեր կողմից չենք տեսնում»,- նշեց Քերոբյանը:

Պատգամավորն էլ նկատեց, որ ապահովագրությունը տարածվում է միայն շատ քիչ քանակության բույսերի վրա, ու Քերոբյանի պատասխանն էլ, ըստ Գառնիկ Դանելյանի, նշանակում է, որ գյուղացին մենակ է՝ իր խնդիրներով:

«Գյուղացուն մենակ եք թողնում ու ոչ մի լուծում չեք տալիս: Կան հակակարկտակայաններ, որոնք շատ քիչ են ու ոչ արդյունավետ, էդ հարցը լուծելու փոխարեն ուրիշ բան եք ասում: Հիմա գյուղացին կա՛մ պիտի արտագաղթի, կա՛մ տուն-տեղը թողնի բանկերին»,- ընդգծեց պատգամավորը: