Եթե պատերազմի վիճակում ենք ապրելու՝ ճանապարհն անիմաստ է լինելու. Ալեն Սիմոնյան

ԱԺ նախագահ Ալեն Սիմոնյանի համար հասկանալի է, որ Ադրբեջանը փորձում է ստեղծված իրավիճակից հնարավորինս ավելին ստանալ:

«Իրենք չեն ուզում կրկնել այն սխալները, որոնք մենք 90-ականներին ունեցել ենք: Միևնույն ժամանակ, իմ գնահատմամբ, իրենք իրենց սխալներն են անում և շատ բաներ հաշվի չեն առնում»,- այս մասին ասաց Ալեն Սիմոնյանը՝ լրագրողների հետ ճեպազրույցում:

Անդրադառնալով տարածաշրջանային հաղորդակցության ուղիների ապաշրջափակման գործընթացում առկա տարաձայնություններին՝ Ալեն Սիմոնյանը նկատեց, որ այդ տարաձայնությունները տեխնիկական են:

«Օրինակ, խոսքը մի պետության մեջ տեղաշարժման մասին է: Ադրբեջանի դիրքորոշման մեջ հիմնական կարմիր գիծն այն է, որ նա իր երկրից երրորդ երկիր չի տեղափոխվում՝ Բաքվից Նախիջևան գնալուց: Բաքվի պատկերացմամբ, այն ենթադրում է, որ մենք պետք է այլ տարբերակ հասկանանք, օրինակ՝ հեշտացված կամ այնպես, ինչպես Նախիջևանի տարածքով մենք իջնենք Մեղրի, այլ հարց է, թե մեզ որքանով է այդ ճանապարհը պետք»,-ասաց Սիմոնյանը:

Նա նշեց, որ Հայաստանը կողմնակից է բոլոր ճանապարհների ապաշրջափակմանը, բայց, եթե երկու երկրները լարված իրավիճակում են ապրելու, ապա այդ ճանապարհն անիմաստ է լինելու:

«Եթե մենք խոսում ենք խաղաղության մասին, ապա սուր նախապայմաններ դնելը, լարվածությունը չիջեցնելու տրամաբանության մեջ հավերժ ապրելը…, եթե պատերազմի վիճակում ենք ապրելու, ճանապարհը, ինչ էլ ուզում է լինի, անիմաստ է լինելու, լավ կլինի, որ ադրբեջանական կողմն այս ամենը հասկանա»,- ասաց Ալեն Սիմոնյանը: