Պետք է ժողովրդի մեջ ընդվզում ձևավորենք, ժողովրդին դուրս բերենք պայքարի. Իշխան Սաղաթելյան (տեսանյութ)

ՀՅԴ ԳՄ ներկայացուցիչ Իշխան Սաղաթելյանը պատրաստվում է դիմադրության նոր ճակատ ձևավորել: Այդ մասին նա հայտարարեց լրագրողների հետ հանդիպմանը:

«Պետք է ժողովրդի մեջ ընդվզում ձևավորենք, ժողովրդին դուրս բերենք պայքարի։ Եվ մեր առաջիկա քայլերն ու գործողություններն ուղղված են լինելու դրան։ Եթե մեր երկրի ներսում չլինի դիմադրություն, եթե օրվա իշխանությունը հասկանա, որ կարող է այդ փաստաթուղթը ստորագրի և մարսի, իրենք ստորագրելու են»,- ասաց Սաղաթելյանը:

Նա հերթական անգամ ընդգծեց, որ այն, ինչի մասին հայտարարել է Նիկոլ Փաշինյանը, խաղաղության պայմանագիր չէ։

«Դա նոր կապիտուլյացիա է։ Իրականում  եթե դա ստորագրվի, ապա այն ողբերգական ու աղետալի հետևանքներ է ունենալու հայ ժողովրդի համար։ Դա կանխելու միակ, գլխավոր ճանապարհը համաժողովրդական ընդվզման և դիմադրության ճակատի ձևավորումն է։ Մենք պետք է հասնենք դրան և մեր գլխավոր նպատակն էլ դա է, որպեսզի այդ փաստաթուղթը չստորագրվի»,- ասաց Սաղաթելյանը:

Ինչպես հանրահավաքների ժամանակ, ասուլիսի ժամանակ ևս Սաղաթելյանը շեշտեց, որ Փաշինյանի և Ալիևի միջև կա պայմանավորվածություն, որ այս տարվա ընթացքում այդ պրոցեսը հասցնեն ավարտին։ Ըստ Սաղաթելյանի՝ իրենք կարող են կանխել դա, բայց դրա համար իրենց ժողովրդի ուժն է պետք:

«Կանխման միակ ճանապարհը համազգային ընդվզումն է։ Սա մեկ անձի, մեկ քաղաքական ուժի խնդիր չէ։ Գաղափարները քննարկելու ենք ՀՀ խորհրդարանական ու արտախորհրդարանական բոլոր առողջ ուժերի հետ, ամբողջացնենք այս ամեն ինչը և դուրս գանք պայքարի»,- ասաց Սաղաթելյանը:

Նա չնշեց կոնկրետ օր, ժամ, տեղ, բայց փորձեց համոզել, որ ամբողջ ուժով լծվելու են այս գործին: