Որ «Տիկ-Տոկ» չմտնեն. Աղազարյանը պարզաբանել է, թե ինչու է Փաշինյանը հրահանգել նիստերից առաջ հավաքել պատգամավորների հեռախոսները. «Ժողովուրդ»

«Ժողովուրդ» օրաթերթը գրում է.

«Քաղաքացիական պայմանագիր» կուսակցության վարչության նախագահ Նիկոլ Փաշինյանի հետ հանդիպումներն իսկական փորձություն և գլխացավանք են «Քաղաքացիական պայմանագիր» խմբակցության պատգամավորների համար:

«Ժողովուրդ» օրաթերթի տեղեկություններով՝ ամեն անգամ, երբ իշխող ֆրակցիայի պատգամավորները հանդիպում են Նիկոլ Փաշինյանի հետ, նիստ են անում, վարչապետի անվտանգության աշխատակիցները պահանջում են, որ պատգամավորների հեռախոսները և «խելացի» ժամացույցները հավաքվեն:

Հավանաբար, Փաշինյանն այնքան է երկյուղում, որ անգամ չի վստահում իր թիմակիցներին:

«Ժողովուրդ» օրաթերթի այս լուրը հաստատեց նաև ԱԺ ՔՊ խմբակցության պատգամավոր Հովիկ Աղազարյանը՝ պարզաբանելով. «Այո՛, նիստերից առաջ պատգամավորների հեռախոսները հավաքում են: Եթե ժամացույց ասելով՝ նկատի ունեք «խելացի» ժամացույցները, այո՛, դրանք էլ են հավաքում»: Աղազարյանը բացատրեց, որ ԱԺ պատգամավորներից հեռախոսները հավաքելու պատճառն այն է, որ «նրանք չշեղվեն, կենտրոնանան նիստում քննարկվող հարցերին և «Տիկ-Տոկ» չմտնեն»:

Փաստորեն, ՔՊ-ականները, ըստ ՔՊ խմբակցության պատգամավորի, «Տիկ-Տոկ» ժամանցային հարթակի սիրահարներ են ու անգամ վարչապետի հետ հանդիպումների ժամանակ են մտնում: Իսկ իրականում պարզ է, որ, բացի «Տիկ-Տոկ»-ից, Նիկոլ Փաշինյանը չի վստահում սեփական թիմին, և իշխանական պատգամավորները ստուգվում են հանդիպումներից առաջ ոտքից-գլուխ»:

Առավել մանրամասն՝ թերթի այսօրվա համարում: