Փաշինյանն ամեն ինչ կանի՝ Երևանը «չհանձնելու» համար. «Հրապարակ»

«Հրապարակ» թերթը գրում է.

««Քաղպայմանագիր» կուսակցության գրասենյակում նախօրեին կայացել է ՔՊ վարչության հերթական նիստը, որը եղել է նախընտրական թեմաներով։ 

Նիկոլ Փաշինյանը կուսակիցներին ասել է, որ ողջ ջանքերն ու ռեսուրսն առաջիկա ամիսներին պետք է ուղղել Երևանի ավագանու ընտրություններին, տողատակերում էլ սպառնացել է, թե անձամբ է վերահսկելու ընտրական գործընթացները և չի ներելու անգործունյա կուսակիցներին։ Նա ընդգծել է, որ պետք է մի կողմ թողնել անձնական բոլոր տարաձայնությունները, քանզի Երևանի «հանձնումը» կնշանակի ժամանակի ընթացում ամբողջական իշխանության հանձնում, մինիմում՝ ՔՊ-ի պարտության դեպքում երկրում երկիշխանություն կձևավորվի՝ իր բոլոր տհաճ հետևանքներով։ Մի խոսքով՝ հրահանգավորել է մոբիլիզացնել բոլոր ռեսուրսները և լուրջ մոտենալ աշնանային գործընթացին։

Երևանի ավագանու ընտրությունները Փաշինյանի համար կենսական նշանակություն ունեն, վարչության նիստում նա հայտարարել է, որ ավագանու ընտրություններում նախընտրական շտաբը կգլխավորի վարչության անդամներից մեկը, ներկայում ԱԻ նախարար Արմեն Փամբուխչյանը, ում լիազորություններն արդեն ավարտվել են՝ կապված ԱԻՆ-ը լուծարելու և ԱԻՆ-ի գլխավոր բաղադրիչը հանդիսացող Փրկարար ծառայությունը ներքին գործերի նախարարության կազմում ընդգրկելու հետ։

Երբ Փամբուխչյանը չնշանակվեց ՆԳ նախարար և անգամ փոխնախարար, լուրեր շրջանառվեցին, որ նրան վարչապետի խորհրդական են նշանակելու՝ այդպես են վարվում բոլոր յուրային պաշտոնաթողների հետ։ Բայց այս փուլում Փաշինյանին հարկավոր է նվիրված ու վստահելի մեկը, ով կկառավարի ընտրությունների գործընթացը և կկատարի ավելի շատ իր, քան Տիգրան Ավինյանի հրահանգները։ Այս առումով Փամբուխչյանը թերևս ամենահարմար թեկնածուն է։ Կուսակցության մեր աղբյուրներից տեղեկացանք նաև, որ ՔՊ-ի հաղթանակի դեպքում միայն Փամբուխչյանը կարող է մտածել որևէ բարձր պաշտոն զբաղեցնելու մասին։

Որոշ տեղեկություններով, Երևանի ավագանու ՔՊ նախընտրական ցուցակն ամբողջությամբ Փաշինյանի կողմից է կազմվելու, համենայնդեպս՝ նա զգուշացրել է, որ պատահական մարդիկ չեն կարող հայտնվել այդ ցուցակում՝ ակնարկելով, որ առնվազն իր հետ պետք է համաձայնեցնել։ Այսպիսով՝ ակնհայտ է, որ Փաշինյանը նպատակ ունի Ավինյանին հնարավորինս փոքր շանս տալ՝ իր թիմը քաղաքապետարան անցկացնելու, և որոշել է նրան անգլիական թագուհու կարգավիճակում պահել, իսկ ցանկում ունենալ պոտենցիալ մի քանի քաղաքապետի թեկնածու, որպեսզի Հայկ Մարությանի դեպքը չկրկնվի։ Նա անձամբ է թիմի աշխատանքը կառավարելու և ամեն կերպ հասկացնում է Տիգրան Ավինյանին, որ քաղաքական մեծ ախորժակ չդրսևորի՝ ամբողջական իշխանության ձգտում չունենա։

Նիկոլ Փաշինյանը նաև խոսել է մրցակիցների մասին, մեր աղբյուրներն անուններ չտվեցին, սակայն նշեցին, որ որոշել են ամենադաժան ձևով պայքարել մրցակիցների դեմ՝ ինչպես 2018-21 թթ․ էին պայքարում։

Երեկ պատերազմն արդեն հայտարարվեց, ինչպես միշտ, առաջինը մարտի նետվեց Փաշինյանի հավատարիմ «զինվորներից» առաջինը՝ Ալեն Սիմոնյանը։ Նա խորհրդարանում լրագրողների հետ ճեպազրույցում հայտարարեց․ «Կարող է՝ Երևանի կենտրոնում, որտեղ տարբեր տեղերից եկած, ՀՀ մայրաքաղաքի էլիտար շենքերում մի քանի բնակարան գնած մարդիկ, որ նախկին իշխանության մաս էին կազմում, նախկին իշխանությանն էին սպասարկում, դժգոհ են, բայց Հայաստանի ժողովուրդը մեզ հետ անմիջական կապի մեջ է: Եվ ես վստահ եմ, որ եթե եկող շաբաթ նոր ընտրություններ լինեն, ՔՊ-ն ավելի շատ ձայն կհավաքի, քան պատերազմից հետո: Մոռանո՞ւմ եք՝ պատերազմից հետո, որ ամենամեծ ցավն էր բոլորի համար, մենք 54 տոկոս ձայն հավաքեցինք, ո՞վ էր դրան հավատում»։ Նշեց նա՝ անուններ չտալով։ Երևանի քաղաքապետի ընտրություններում ՔՊ-ի հաղթանակը երաշխավորվա՞ծ է, ԱԺ նախագահն արձագանքեց. «Ես վստահ եմ, որ մեր թեկնածուն հաղթելու է, որովհետև այն բարեփոխումները, որոնք արվել են ու արվում են Երևանում, ակնհայտ են: Կառավարության կողմից տրված գումարները, որոնց շնորհիվ վերելակներ են նորոգվում, ավտոբուսներ են բերվում, կանաչապատում է իրականացվում, շենքերն են վերանորոգվում, այդ ամենն անում է կառավարությունը, անում է ՔՊ-ն»:

Նկատենք, որ այս պահին թվում է, թե Ավինյանին հաղթելը շատ բարդ է, որովհետև ռեալ մրցակիցներ չկան դաշտում՝ ոմանք չեն շտապում պաշտոնապես ազդարարել իրենց մասնակցության մասին, որոշները փնտրտուքների մեջ են։ Լուրջ մրցակից է դիտվում նախկին քաղաքապետ, դերասան Հայկ Մարությանը, ով, ըստ ՔՊ հարցումների, շրջանառվող թեկնածուների ցանկում ամենամեծ վարկանիշն ունի։ Բավականին լավ ստարտային վիճակում է «Ապրելու երկիր» կուսակցությունը, որի թեկնածուն Մանե Թանդիլյանն է։ Իսկ տիտղոսակիր ընդդիմությունը դեռ դիրքավորվել է ու չի բացում խաղաքարտերը։ Ակնհայտ է, որ ՀՀ երկրորդ նախագահը հետ է քաշվել, եթե անցած տարի խոսվում էր որդու հնարավոր առաջադրման մասին, ապա այժմ հարցը փակված է, և Քոչարյանն էլ սկսել է շրջագայել արտերկրում ու ամեն ինչով հասկացնում է, որ ինքն այլևս չի ակտիվանալու՝ իրենից ձեռք քաշեն։ Նաև դա է պատճառը, որ նա թեև ակնհայտորեն չի աջակցում, բայց չի էլ խանգարում «Հայաստան» խմբակցության պատգամավոր Անդրանիկ Թևանյանին՝ մտնելու քաղաքապետի պաշտոնի համար պայքարի մեջ։ Նա հավաքել է թիմին, հայտարարել, որ լրատվական ու ֆեյսբուքյան ռեսուրսները տրամադրում է Թևանյանին, առաջարկել է աջակցել՝ ով ինչով կարող է, սակայն գոնե ԱԺ խմբակցությունը դրական չի վերաբերվել այդ փաստին, և դա է պատճառը, որ «Հայաստան» դաշինքի 29 պատգամավորից գրեթե ոչ մեկը չկա Թևանյանի կողքին։ Իսկ Սերժ Սարգսյանը, ըստ լուրերի, պատրաստ է աջակցել Արթուր Վանեցյանին, եթե վերջինս որոշի առաջադրվել։ Ու չնայած ժամանակը շատ կարճ է, բայց Արթուր Վանեցյանը դեռ վերջնական որոշում չի կայացրել։ Նա պատրաստ էր առաջադրվել, եթե խորհրդարանական ընդդիմությունը միավորվեր իր թեկնածության շուրջ, սակայն Թևանյանը ձախողել է այդ պլանները։ Թեև բոլորը հասկանում են, որ Անդրանիկ Թևանյանը շատ փոքր շանսեր ունի»: