Գնաճի դեմ պայքարն ավարտված չէ. Մարտին Գալստյան

Կենտրոնական բանկը չի համարում, թե գնաճի դեմ պայքարն ավարտված է: Ազգային ժողովում այսօր՝ բյուջեի կատարողականի քննարկման ժամանակ, ասաց Կենտրոնական բանկի նախագահ Մարտին Գալստյանը։

«Մեր կանխատեսումների համաձայն՝ գնաճն այս տարի կլինի թիրախից ցածր, այսինքն՝ մենք կունենանք նպատակադրված թիրախից ցածր գնաճ, որը, մեր պատկերացմամբ, խելամիտ քաղաքականություն է, որովհետև երկու տարի անընդմեջ բարձր գնաճ ունենալուց հետո, պիտի լինի ժամանակ, երբ ԿԲ-ն իրականացնելու է դիսինֆլյացիոն քաղաքականություն»,- ասաց ԿԲ ղեկավարը:

Նա տեղեկացրեց, որ նախորդ տարվա գնաճը պայմանավորված է եղել թե՛ առաջարկով, թե՛ պահանջարկով:

«Պահանջարկի հիմնական բաղադրիչը եղել է արտածին, այսինքն՝ մենք ունեցել ենք միջազգային այցելուների ներհոսք, որոնք պահանջարկ են ձևավորել Հայաստանի ապրանքների ու ծառայությունների նկատմամբ, որի արդյունքում մենք տեսնում ենք, որ նույնիսկ մինչև հիմա հյուրանոցային և ռեստորանային ծառայությունների գնաճը 8.7 տոկոս է: Ես փորձեցի տրամաբանորեն բացատրել, թե ինչո՞ւ է ԿԲ-ն ավելի զուսպ՝ տոկոսադրույքն իջեցնելու պարագայում, որովհետև մենք չենք համարում, որ գնաճի դեմ մեր պայքարն ավարտված է»,- ասաց Գալստյանը:

Անդրադարձավ հարցին, թե տնտեսական աճի կանխատեսման հիմքում ի՞նչ գործոններ են ընկած, նա նկատեց, որ ծառայությունների ու շինարարության ոլորտը շարունակելու են աճել այս տարվա ընթացքում՝ պայմանավորված նաև ներքին և արտաքին գործոններով։

«Արդյունաբերության աճը լինելու է 6 տոկոսի շրջանակներում և մի քիչ ավել, գյուղատնտեսությունն ունենալու է փոքր դրական աճ»։ Ըստ Գալստյանի՝ ԿԲ վերջին կանխատեսումների համաձայն՝ Հայաստանի տնտեսական աճն այս տարի կկազմի 6․9 տոկոս, որը կրկնակի պակաս է նախկին կանխատեսումից։ Ըստ ԿԲ նախագահի՝ պետք է հասկանալ, որ երկարաժամկետ կամ միջնաժամկետ հատվածում տնտեսությունը չի կարող հարատև աճել ավելի շատ, քան իր ներուժն է։