Հակարիի հատվածում հերթական սադրանքը ենթադրում է, որ ադրբեջանցիներն ուզում են ավելի խորացնել Արցախի շրջափակումը. Սեյրան Օհանյան

Իշխանությունների պարտականությունն է նման դեպքերում ճիշտ տեղեկատվություն ներկայացնելը, որպեսզի փարատեն այն բոլոր մտահոգությունները, որոնք կան մեր ժողովրդի, հանրության մոտ: Իսկ այսօրվա դեպքն ադրբեջանցիների հերթական սադրանքն է: Նրանք տարբեր հատվածներում են սադրանքներ կազմակերպում՝ իրական իրավիճակից շեղելու և նաև իրենց նպատակներն առաջ տանելու համար: Այս մասին այսօր ԱԺ-ում լրագրողների հետ զրույցում ասաց Սեյրան Օհանյանը՝ անդրադառնալով Ադրբեջանի սահմանապահ մի խումբ զինծառայողների կողմից Հակարիի կամրջի ուղղությամբ առաջխաղացման փորձ կատարելուն: 

Օհանյանի խոսքով՝ Ադրբեջանը շարունակում է հայկական կողմի վրա ճնշումներ գործադրել՝ թե՛ ՀՀ-ի, թե՛ Արցախի ուղղությամբ: Հակարիի հատվածում հերթական սադրանքը ենթադրում է, որ ադրբեջանցիներն ուզում են ավելի խորացնել Արցախի շրջափակումը: Նրանք, այդպես առաջ գալով, փորձում են ինքնուրույն սահմանագծում, սահմանազատում, սահմանների ճշգրտում անել, ինչպես անում են ՀՀ-ի տարածքներում: 

«Լավ է, որ հայկական կողմը կարողացել է կանխել և դուրս շպրտել: Բայց, օրինակ, եթե Տեղ գյուղի հատվածներում լիներ, ապա մենք դժվարին իրավիճակում կլինեինք: ՀՀ ԶՈւ-ի և ԱԱԾ-ի խնդիրն է միշտ լինել մարտունակ վիճակում, միշտ կանխարգելել նման միջադեպերը»,- նշեց Օհանյանը: 

Հարցին, թե ինչ է նշանակում ադրբեջանական դրոշ դնել այդ հատվածում, Օհանյանն ասաց, որ դա նշանակում է ևս մեկ անգամ նշել, գծել Ադրբեջանի սահմանը: Եվ իհարկե, դա առաջխաղացման փորձ է, եթե դա եղել է ՀՀ սահմաններում: Եթե եղել է սահմանի վրա, ապա մեզ համար էլի վատ է, քանի որ դա տեղի է ունենում միջանցքում, որը պետք է ապահովի Հայաստանի և Արցախի բոլոր տիպի կապերը: