Ֆրանսիան մտահոգություն է հայտնել Երասխում տեղի ունեցածի կապակցությամբ և շեշտել Հաագայի դատարանի որոշումը կատարելու անհրաժեշտությունը

Ֆրանսիան ափսոսանք է հայտնել զինված միջադեպերի առիթով, որոնք տեղի են ունեցել վերջին 48 ժամում Հայաստանի և Ադրբեջանի միջև սահմանի մի քանի կետերում, ներառյալ Հայաստանի տարածքում՝ Երասխում քաղաքացիական անձանց գնդակոծությունը։ Երկիրը զսպվածության, լիցքաթափման և քաղաքացիական բնակչության պաշտպանության կոչ է արել։ Այս մասին նշվել է Ֆրանսիայի ԱԳՆ հայտարարությունում։

«Ֆրանսիան նորից հայտարարում է, որ աջակցում է Միջազգային դատարանի 2023թ. փետրվարի 22-ի որոշման կատարմանը (Լաչինի- խմբ.) միջանցքում երթևեկության վերականգնման մասին։

Ֆրանսիան հավատարիմ է խաղաղության վերադառնալուն՝ ի բարօրություն տարածաշրջանի ամբողջ բնակչության։ Հայաստանի և Ադրբեջանի միջև բանակցությունները վերջերս շարունակվել են բարձր մակարդակով Քիշնևում, հունիսի 1-ին, Եվրոպական քաղաքական ընկերակցության գագաթաժողովի շրջանակում։ Ադրբեջանի նախագահ Իլհամ Ալիևը և Հայաստանի վարչապետ Նիկոլ Փաշինյանը բանակցություններ են վարել Ֆրանսիայի Հանրապետության նախագահի, Գերմանիայի կանցլեր Օլաֆ Շոլցի և Եվրոպական խորհրդի նախագահ Շառլ Միշելի հետ։ Այդ հանդիպումը ցուցադրել է քննարկվող տարբեր հարցերի շուրջ առաջընթացի հասնելու ցանկությունը, այդ հարցերը պետք է լուծվեն բացառապես բանակցությունների ճանապարհով։

Եվրոպայի և արտաքին գործերի գծով նախարար Քատրին Կոլոնան ապրիլին այցելել է Հայաստան և Ադրբեջան, որպեսզի օգնի երկու երկրներին առաջ ընթանալ խաղաղության համաձայնագրի հարցում։ Այդ ջանքերը նախաձեռնվում են Եվրամիության և Միացյալ Նահանգների հետ սերտ կոորդինացմամբ»,- նշվել է Ֆրանսիայի ԱԳՆ հայտարարությունում։