100 մլն դրամ աշխատավարձի պարտքի դեմ մարզպետն անզոր է. (տեսանյութ)

Այսօր` փետրվարի 2-ին «Վանաձոր-Քիմպրոմի» կազմում գործող ՋԷԿ-ի աշխատակիցները հերթական անգամ հավաքվել են Լոռու մարզպետարանի դիմաց` իմանալու, թե վերջապես, ե՞րբ են տալու իրենց աշխատավարձերը:

Նախկինում որպես առանձին կազմակերպություն գործած «Region Energy»-ի աշխատակիցների 5 տարվա աշխատավարձի ընդհանուր պարտքը կազմում է 100 մլն դրամ:

Վերջիններս հույս ունեին, որ «Քիմպրոմի» աշխատակիցներին խոստացված աշխատավարձերի հետ իրենք ևս կստանան իրենց գումարները: Սակայն դեռ նախորդ տարվա դեկտեմբերին բաժանած գումարների մեջ ՋԷԿ-ի աշխատողները չէին ընդգրկվել:

Մարզպետ Արթուր Նալբանդյանի հետ հանդիպումն էլ խոստումնալից չէր:

Վերջինս իրենց աշխատավարձերը պահանջող մարդկանց հետ զրույցում նկատեց, որ աշխատանքային պայմանագիրը ստորագրելիս այն չեն ընթերցել և դրա համար էլ այսօր չգիտեն, թե ումից պահանջեն իրենց գումարները:

Աշխատակիցներից մեկի դիտարկմանը, թե գիտեն ու ճանաչում են այդ մարդուն, մարզպետը նկատեց. «Աչքիս դուք ինձնից բացի ոչ մեկի չեք ճանաչում… Ես ոչինչ չեմ կարող անել: Ձեր աշխատավարձերը նախատեսված է տրամադրել «Քիմպրոմի» օտարումից ստացած գումարներից: Բայց գազի, գույքահարկի ու էլի էնքան պարտքեր ունի գործարանը կուտակած, որ չգիտեմ, թե որ մեկին առաջնահերթությունը կտան»,- ասաց Արթուր Նալբանդյանը:

Նկատենք, որ աշխատակիցները գործը տվել են դատարան և շահել դատը, սակայն մինչ օրս նրանց ոչ ոք աշխատավարձ չի տվել: Վերջիններս պատրաստվում են դիմել Արդարադատության նախարարությանը, ինչին Լոռու մարզպետը խոստացավ աջակցել:

Մանրամասները` տեսանյութում