Ներսում ինչ ուզում՝ անում են. ասացին՝ բռնի ուժ կիրառել. Դավիթ Հարությունյանը մանրամասներ հայտնեց ԲԴԽ դռնփակ նիստից (տեսանյութ)

Դատավոր Դավիթ Հարությունյանը հավանաբար կդիմի փաստաբանների օգնությանը: Այս մասին նա հայտնեց լրագրողների հետ զրույցում, երբ դուրս եկավ ԲԴԽ նիստի դահլիճից:

«Չեմ հասկանում՝ ինչ է կատարվում, ներսում ինչ ուզում՝ անում են»,- ասաց նա:

Նա նշեց, որ միջնորդել է, որ հնարավորություն տան՝ ընդմիջում հայտարարվի, որ հաղորդում ներկայացնեմ, սակայն դրան չեն անդրադարձել:

«Ուղղակի միանվագ Արդարադատության նախարարության միջնորդություններն են քննարկվում», - ասաց դատավոր Դավիթ Հարությունյանը։

Նա նաև նշեց, որ հայտարարվել է բռնի ուժ կիրառել:

«Ուզում էի հասկանալ՝ ճիշտ լսեցի՞, թե՞ չէ, որ ասաց՝ ֆիզիկական ուժ կիրառեք, հարցրեցի՝ իմ նկատմա՞մբ, ասաց՝ չէ՛, գույքի։ Հիմա ուզում եմ հասկանալ՝ հանցագործությա՞ն մասին հաղորդում ներկայացնեմ, թե՞ կարգապահական պատասխանատվության ենթարկելու», - նշեց Դավիթ Հարությունյանը:

Նա հայտնեց, որ ԲԴԽ-ն որոշել է դռնփակ ռեժիմով քննել իր կարգապահական պատասխանատվության ենթարկելու մասին ՀՀ ԱՆ միջնորդությունը:

Դավիթ Հարությունյանն իր հետ անգամ բարձրախոս է տարել, որ ձայնագրի, սակայն բոլոր սարքավորումները նրանից վերցրել ու դուրս են հանել նիստի դահլիճից:

Նա լրագրողներին խնդրեց չխլել իր ժամանակն ու թույլ տալ օգտվել ընդմիջումից, որպեսզի հասկանա՝ ինչ է կատարվում ու ինչ պետք է անել: