Որևէ մեկը չի կարող ասել, որ իմ՝ վարչապետի պաշտոնը ստանձնելուց հետո բանակում որևէ բան չի արվել այն պատճառով, որ կառավարությունն ասել է՝ փող չկա․ Փաշինյան

Մինչ պատերազմը մեր ուշադրության կենտրոնում է եղել նաև բանակի արդիականացման թեման։ Ոչ այն պատճառով, որ ի սկզբանե պատերազմը համարել եմ անխուսափելի, այլ այն պատճառով, որ բանակի մարտունակությունը պետք է էականորեն բարելավեր Հայաստանի բանակցային դիրքերը։ Այս մասին այսօր 44-օրյա պատերազմի հանգամանքներն ուսումնասիրող քննիչ հանձնաժողովում հայտարարեց Նիկոլ Փաշինյանը:

Նրա խոսքով՝ 2018, 2020 թվականներին, կատարվել են բանակի մարտունակության բարձրացման համար էական որոշումներ։ Բարձրացվել է զինվորականների աշխատավարձը, սպառազինության և ռազմական տեխնիկայի խոշոր գնումներ են իրականացվել։ 

«2018-ից մինչև 2020թ․-ի 44-օրյա պատերազմի մեկնարկը, այսինքն՝ 2 տարի 4 ամսում, ՀՀ կառավարությունը սպառազինության և ռազմական տեխնիկայի ձեռքբերման համար ծախսել է շուրջ 608 մլրդ դրամ։ Համեմատության համար ասեմ, որ 2008թ․ հունվարի 1-ից մինչև 2018թ․-ի մայիսը, այսինքն՝ նախորդող 10 տարի 4 ամսում, ՀՀ նախորդ կառավարությունները ծախսել են 354 մլրդ դրամ։ Այսինքն՝ մենք 2 տարում իրականացրել ենք 10 տարվա ձեռքբերումների գրեթե կրկնակի ձեռքբերումներ։ Եվ էլի ուզում եմ հստակ արձանագրել, որևէ մեկը չի կարող ասել, որ 2018թ․- հետո, իմ՝ վարչապետի պաշտոնը ստանձնելուց հետո բանակում որևէ բան չի արվել այն պատճառով, որ կառավարությունն ասել է փող չկա։ Էդպիսի բան ուղղակի լինել չի կարող»,- նշեց Փաշինյանը։ 

Նրա խոսքով՝ ամենամեծ ապացույցը «Սու-30»-ի ձեռքբերումն է։ 

«Ես ասեմ եմ, հարգելի գործընկերներ, ինչ պետք է բանակին, մենք դա կապահովենք։ Ձեր խնդիրը չէ, թե ոնց»,- նշեց նա։