Փաշինյանի հակասությունների մեխը մի նպատակ ունի՝ ինձ խաբել են, իմ գրպանն են գցել, ես հարիֆ եմ. Գեղամ Մանուկյան

Այսօրվա ելույթները շատ թեթև եմ լսել։ Նախորդ 3 տարիներին Փաշինյանը Շուշիի մասին այնքան հակասող բաներ է ասել, որ եթե այդ ամբողջ հակասություններն իրար կողք դնենք, մի ամբողջ նախաքննություն պետք է լինի։ Այդ հակասությունների մեխն ունի մեկ նպատակ, այն է՝ ես դրա հետ կապ չունեմ, ես որևէ գործ չունեմ, ինձ խաբել են, իմ գրպանը գցել են, ես հարիֆ եմ։ Եվ այդ թեզով Փաշինյանն այսօր ամբողջական զեկույց է ներկայացնում։ Այս մասին այսօր 44-օրյա պատերազմի հանգամանքներն ուսումնասիրող քննիչ հանձնաժողովում Նիկոլ Փաշինյանի հարցանքննությունից հետո, ասաց «Հայաստան» դաշինքի անդամ Գեղամ Մանուկյանը։ 

Նրա խոսքով՝ իրականում, քանի որ Շուշին բոլորի համար անհատական ցավ է, ուստի Փաշինյանը փորձում է Շուշիի վրա կենտրոնանալ։

«Փաշինյանի այսօրվա զեկույցում իրականում ոչ մի հանգամանք չկար պատերազմի հանգամանքների մասին։ Միայն բանակը չէ, որ պատերազմը տանում է, պատերազմը համալիր է, պատերազմը թիկունքում է, լրագրողների մասնակցությունն է, այս խորհրդարանի նախկին պատգամավորների մասնակցություն է։ Ամեն մեկը պետք է իր դերակատարությունն ունենա, այդ թվում՝ Կառավարությունը։ Փաշինյանը ոչ մի բան չի ասում, երբ սեպտեմբերի 27-ին լսեց պատերազմի լուրը, ի՞նչ քայլեր ձեռնարկեց։ Մի հատ նայեք իրա ֆեյսբուքյան էջը»,- նշեց Մանուկյանը։