Լոնդոնում Բայրամովը խոսել է «Զանգեզուրի միջանցք»-ի կարևորության մասին և դժգոհել՝ Հայաստանը դժվարություններ է ստեղծում հաղորդակցությունների բացման հարցում

Հունիսի 20-ին Ադրբեջանի Արտաքին գործերի նախարար Ջեյհուն Բայրամովը ելույթ է ունեցել Մեծ Բրիտանիա կատարած աշխատանքային այցի շրջանակում Կասպյան քաղաքական կենտրոնի կողմից կազմակերպված Կասպյան կապի համաժողովում։ Այս մասին գրում է APA-ն:

Նշվում է, որ իր ելույթում Բայրամովը խոսել է բացառիկ աշխարհագրական դիրք ունեցող Կասպից ծովի տարածաշրջանի ստեղծած հնարավորությունների մասին։ Նա ընդգծել է, որ մեծանում է Կենտրոնական Ասիայի, Կասպից ծովի և հետագայում Կովկասի տարածքով տրանսպորտային ուղիների կարևորությունը։

Նրա խոսքով՝ ուշադրություն է դարձվում Ադրբեջանի տրանսպորտային ենթակառուցվածքների դիվերսիֆիկացմանն ու արդիականացմանը, մի շարք տրանսպորտային ենթակառուցվածքային նախագծեր են խթանվում՝ Եվրոպայի և Ասիայի միջև առևտուրն ու լոգիստիկայի ընդլայնման համար։ Ադրբեջանը հանդիսանում է ակտիվ նախաձեռնող և վստահելի գործընկեր տարածաշրջանային հաղորդակցության մի շարք այլ նախագծերի իրականացման գործում, ինչպիսիք են Բաքու-Թբիլիսի-Կարս երկաթուղին և անդրկովկասյան օպտիկամանրաթելային մալուխի նախագիծը։

2022 թվականին Ադրբեջանի տարածքով տարանցումն աճել է 75%-ով։ Նա վստահություն է հայտնել, որ բոլոր հաղորդակցությունների բացումը կնպաստի տարածաշրջանում հետագա կայուն խաղաղությանն ու կայունությանը, էապես կբարձրացնի առևտուրն ու տրանսպորտը։ Այս առումով նա խոսել է «Զանգեզուրի միջանցք»-ի կարևորության մասին, որն ունի Միջին միջանցքի շրջանակներում հաղորդակցությունների հետագա ընդլայնման ներուժ:

Բայրամովը դժգոհել է, որ «չնայած գործադրված ջանքերին՝ Հայաստանը դժվարություններ է ստեղծում հաղորդակցությունների բացման հարցում»։