Հիմնանորոգվել է հրշեջ-փրկարարական ջոկատի շենքը

Հունիսի 20-ին ՓԾ տնօրենի տեղակալ, փրկարարական ծառայության գնդապետ Դ․ Սարգսյանը Երևան քաղաքի փրկարարական վարչության պետ, փրկարարական ծառայության գնդապետ Ա․ Կիրակոսյանի, թիվ 2 հրշեջ-փրկարարական ջոկատի հրամանատար, փրկարարական ծառայության փոխգնդապետ Ա․ Լալայանի ուղեկցությամբ շրջայց է կատարել Սևանի փողոցի 124 հասցեում գտնվող Երևան քաղաքի փրկարարական վարչության թիվ 2 հրշեջ-փրկարարական ջոկատի հիմնանորոգված շենքում։

Ամբողջությամբ վերանորոգվել են մոտ 650 քմ մակերեսով երկհարկանի շենքը և տանիքը։

Իրականացվել են շենքի արտաքին և ներքին հարդարման աշխատանքներ․ ձևափոխվել և վերակառուցվել են հանգստի սենյակները, խոհանոցը, հանդերձարանները, ավտոկայանտեղին։

Վերանորոգման աշխատանքներից հետո հրշեջ-փրկարարական ջոկատի տարածքն ամբողջությամբ գազաֆիկացվել է և ապահովվել կենտրոնացված ջեռուցման համակարգով։

Ջոկատի հիմնանորգված շենքում ստեղծվել են անձնակազմի համար աշխատանքային և կենսաապահովման անհրաժեշտ բոլոր պայմանները․ բարելավվել են կոմունալ բոլոր հարմարությունները, խոհանոցը համալրվել է համապատասխան գույքով։ Հիշեցնենք, որ շինաշխատանքները մեկնարկել էին 2022 թվականի նոյեմբեր ամսից՝ պետբյուջեի ֆինանսավորմամբ։

Հիմնանորոգված շենքը համապատասխանում է ժամանակակից բոլոր պահանջներին, որը հնարավորություն է ստեղծում պաշաճ մակարդակով կազմակերպել ծառայությունը։