Կուլիսային պայմանավորվածությո՞ւն, թե՞... գոնե հանուն զոհված որդուդ հիշատակի, խրախճանքիդ մասին այդքան հրճվանքով մի բարձրաձայնիր

Գայանե Հակոբյան, Գայանե Մարտիրոսյան և Ազգուշ Հակոբյան. այս անուն ազգանունով քաղաքացին նույն մարդն է՝ Արցախյան 44-օրյա պատերազմում զոհված զինվոր Ժորա Մարտիրոսյանի մայրը:

Այս կնոջ համար շատերն են լացել, այս կնոջ վիշտը շատերն են համարել իրենցն ու լացել, սրտնեղել, բայց պարզվում է՝ նա որքան անուն-ազգանուն, այդքան էլ դեմք-դիմակ ունի:

Բազմիցս է քննարկվել, ծանր ու թեթև արվել այն թեզը, թե՝ գուցե ի սկզբանե Գայանե Հակոբյանի ու Փաշինյանների միջև գաղտնի պայմանավորվածություն է եղել և շոու բեմադրվել:

Ոմանք չհավատացին, ոմանք սկսեցին վատաբանել նման տեսակետ տարածողներին... մի խոսքով՝ Ֆեյսբուքը խառնվեց իրար, մյուս զոհվածների ծնողներն ու բազում քաղաքացիներ եկան Գայանեին աջակցելու, իսկ ինքը՝ Գայանեն, անխռով հանգիստ խաղում էր իր դերը: Այսինքն այն, ինչ սցենարով տվել էին նրա ձեռքն ու հրամայել խաղալ՝ հավանաբար կլորիկ, շա՜տ կլորիկ  գումարի դիմաց:

ինչո՞ւ հանկարծ Աշոտը հայտնվեց դատարանի մոտ,

ինչո՞ւ Գայանեն որոշեց վերցնել մեքենայի բանալին,

ինչո՞ւ նա ոչ մեկին չտարավ իր հետ՝ զերծ մնալով վկաներից (թեև առաջարկ եղավ նրանց հետ գնալու),

ինչո՞ւ հանգիստ մեքենա նստած Աշոտը հանկարծ թռավ մեքենայից... 

ինչո՞ւ նրան նախ ազատազրկեցին, հետո տնային կալանքի ենթարկեցին, հետո նորից կալանավորեցին

ինչո՞ւ նիստը դռնփակ անցկացրին և այդ ինչպե՞ս նրան 4 տարի ազատազրկեցին՝ ազատ արձակելով...

ինչպե՞ս նրան թույլ տվեցին երկրից բացակայել...

ինչուներն ու ինչպեսները շատ են, իսկ պատասխանը մեկը՝ ամեն ինչ պայմանավորված էր...

Այլ կերպ ասած՝ «Աշոտիկ-Գայանե (Ազգուշ)» շոուն սահուն կերպով փակեց թմրանյութերի թեման, Փաշինյանի հանդիպումն Ալիևի հետ, նույն Փաշինյանի այցը Թուրքիա, սահմանի լարվածությունն ու էլի շատ ավելի կարևոր, օրակարգային հարցեր:

Գիտեի՞ն այդ կուլիսային պայմանավորվածությունների մասին մյուս զոհված տղաների ծնողները, թե ոչ, բայց հայտարարություն տարածեցին, որ որոշում է կայացվել Գայանե Հակոբյանին հեռացնել «Որդիների կանչ» ՀԿ-ի շարքերից:

Բեմադրությունը գուցե համոզիչ լիներ, եթե «տիկին» Գայանեն մի քիչ էլ «ձգեր» ու այդքան ցինիկ չգտնվեր, որ ազատ արձակվելուց անմիջապես հետո մեկնի խրախճանքի՝ Եգիպտոս:

Հիշեցնենք, որ դատարանը վճռել է Ազգուշ Մարտիրոսյանին (Գայանե Հակոբյան) մեղավոր ճանաչել, դատապարտել 4 տարի ժամկետով։ Նրա նկատմամբ նշանակված պատիժը պայմանականորն չկիրառել ու սահմանել փորձաշրջան 1 տարի ժամկետով։ 

Այսինքն՝ մեկ տարի Գայանե Հակոբյանն իրավունք չուներ բացակայել երկրից: 

Ու երբ նրա հրապարակման ներքո հայտնվեցին նման դիտարկումներ՝ տիկինն անմիջապես փակեց գրառումը՝ թողնելով այն միայն ընկերների համար:

Ինչևէ... բեմականությունը՝ բեմականությամբ, բայց նա այնքան ամոթ ունենար, որ եթե ոչ իրեն այդ օրերին աջակցողների, ապա գոնե հանուն իր զոհված որդու հիշատակին՝ խրախճանքի մասին այդքան հրճվանքով չբարձրաձայներ: Այն էլ այն դեպքում, երբ երկրից իրավունք չուներ բացակայելու... 

Արմինե Մկրտումյան