Փաշինյանը պարզապես ստում է՝ այդ օրը հնարավոր էր Շուշիի պահպանմամբ հրադադար. Հայկ Մամիջանյան
Փաշինյանը խոսում է զինվորներին փրկելու մասին ու արդեն որերորդ անգամ այդ զինվորների թիվը փոխվում է․ մի պահ ասում էր՝ 20 հազար զինվոր է փրկել, հետո՝ 30, հիմա էլ պարզվում է՝ 25 հազար զինվոր է փրկել։ Այս մասին ասուլիսի ժամանակ ասաց ԱԺ «Պատիվ ունեմ» խմբակցության ղեկավար Հայկ Մամիջանյանն՝ անդրադառնալով Նիկոլ Փաշինյանի հայտարարություններին։
«Սա լավագույնս ցույց է տալիս, որ զինվորի կյանքը Փաշինյանի համար արժեք չունի․ դա նաև երևում է նրա գործողությունների հետագծից»,- ասաց Հայկ Մամիջանյանը։
Ինչ վերաբերում է հոկտեմբերի 19-ին արտախորհրդարանական ուժերի հետ Փաշինյանի հանդիպմանը, ապա այս մասին խոսելիս, Մամիջանյանը հիշեցրեց, որ այդ հանդիպմանը ՀՀԿ-ից մասնակցել է Էդուարդ Շարմազանովը, ով փոխանցել է Փաշինյանի հայտարարությունները՝ կապված Շուշիի և Սյունիքով անցնող ճանապարհի կարմիր գծերի հետ։
«Փաշինյանը փորձում է մանիպուլյացնել՝ փախստականների վերադարձը ներկայացնելով, որ իբր, ըստ ադրբեջանական կողմի, 90%-ով ադրբեջանցիներով բնակեցված Շուշի կվերադառնային ադրբեջանցիները և փաստացի այն չէր լինի Արցախի Հանրապետության տիրապետության տակ»,- հայտնեց Մամիջանյանը։
Նա հիշեցրեց նաև, որ նոյեմբերի 9-ի եռակողմ հայտարարության տեքստում ասվում էր, թե ՄԱԿ-ի փախստականների գրասենյակի հովանու ներքո տեղի է ունենալու փախստականների վերադարձ իրենց նախկին բնակության վայրերը։
«Այս պահի դրությամբ Արցախի Հանրապետության տարածքում արդյոք մեկ ադրբեջանցի վերադարձե՞լ է»,- հարցրեց Հայկ Մամիջանյանն ու շարունակեց․ «Հետևաբար ներկայացնել, թե նմանօրինակ ձևակերպումը նշանակում էր Շուշիի կորուստ, մանիպուլյացիա է, Փաշինյանը պարզապես ստում է, այդ օրը հնարավոր էր Շուշիի պահպանմամբ հրադադար»,- ասաց նա։
