Ղազար Փարպեցու փողոցում գիշերը հնչած կրակոցի դեպքի առթիվ նախաձեռնվել է քրվարույթ. կա ձերբակալված

Երևանի Ղազար Փարպեցու փողոցում գիշերը հնչած կրակոցի և խուլիգանության դեպքի առթիվ նախաձեռնվել է քրեական վարույթ

Այս մասին հայտնում են ՔԿ-ից:

«2023թ. հունիսի 24-ին՝ ժամը 00:24-ի սահմաններում, Երևան քաղաքի Ղազար Փարպեցու փողոցի 11Ա հասցեի մոտ հնչած կրակոցի դեպքի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական երրորդ բաժնում նախաձեռնվել է քրեական վարույթ՝ ՀՀ քրեական օրենսգրքի 335-րդ հոդվածի 1-ին մասով (Հրազենի, դրա հիմնական բաղկացուցիչ մասերի, ռազմամթերքի եւ այլ նյութերի,սարքերի, առարկաների ապօրինի շրջանառությունըսարքերի, առարկաների ապօրինի շրջանառութ), 297-րդ հոդվածի 3-րդ մասով (Խուլիգանությունը) և 167-րդ հոդվածի 1-ին մասով (Առողջությանը միջին ծանրության վնաս պատճառելը)։

Կատարվում է նախաքննություն՝ դեպքի հանգամանքները պարզելու ուղղությամբ։

Նախնական տվյալներով՝ նշված հասցեի մոտ երկու տղամարդու միջև անձնական հարցերի շուրջ ծավալված վիճաբանության արդյունքում նրանցից մեկը հարվածներ է հասցրել մյուսին՝ պատճառելով մարմնական վնասվածքներ։ Այդ ընթացքում հնչել է կրակոց, նախնական տվյալներով, որսորդական հրացանից։ Դեպքի վայրում հայտնաբերվել է 1 հատ 12մմ տրամաչափի կրակված պարկուճ։

Տղամարդկանցից մեկը վնասվածքներով տեղափոխվել է «Հերացի թիվ 1» ԲԿ. նախնական տվյալներով՝ ստացած վնասվածքները հրազենային չեն։

Նշանակվել են դատաբժշկական, ինչպես նաև՝ դատաձգաբանական փորձաքննություններ։

Վարույթի շրջանակներում, հանցանք կատարելու մեջ անմիջականորեն ծագած հիմնավոր կասկածի հիմքով, վիճաբանության մյուս մասնակիցը ձերբակալվել է։

Ձեռնարկվում են անհետաձգելի քննչական, ինչպես նաև՝ օպերատիվ-հետախուզական միջոցառումներ՝ դեպքի ամբողջական հանգամանքները պարզելու, հրազենը հայտնաբերելու ուղղությամբ»,-ասված է ՔԿ հաղորդագրության մեջ։

Ավելի վաղ տեղեկացրել էինք, որ այսօր՝ հունիսի 24-ին, կրակոցներ էին հնչել Երևանում։ Ժամը 00։40-ի սահմաններում ՀՀ Ներքին գործերի նախարարության Ոստիկանության Կենտրոնական բաժնում օպերատիվ տեղեկություններ էր ստացվել, որ Փարպեցու 11Ա հասցեի մոտ կրակոցներ էին հնչել։