«Խաղաղության» դարաշրջանի բացումը ԱԹՍ-ների ներքո. խոստացված ապագան չի ուշանում

Երեկ Վաշինգտոնում ընթանում էր ՀՀ ԱԳ նախարար Արարատ Միրզոյանի, Ադրբեջանի ԱԳ նախարար Ջեյհուն Բայրամովի, ԱՄՆ պետական քարտուղար Էնթոնի Բլինքենի եռակողմ հանդիպումը: 

ՀՀ ԱԳՆ-ի հաղորդագրության համաձայն՝ Բլինքենն ու Միրզոյանը քննարկվել են տարածաշրջանային անվտանգությանն ու կայունությանն առնչվող հարցեր, անդրադարձ է կատարվել Հայաստանի և Ադրբեջանի միջև հարաբերությունների կարգավորման գործընթացին: Առաջ է քաշվել սահմանազատման գործընթացի ապահովման հարցը ևս, որը պետք է հիմնված լինի Ալմա-Աթայի հռչակագրի և 1975թ. քարտեզի վրա:

Բայրամովն ու Բլինքենն իրենց հերթին քննարկել են Բաքվի և Երևանի միջև խաղաղ համաձայնագրի նախագծի շուրջ բանակցությունների հեռանկարները:

Հանդիպումների ավարտից հետո, ԱՄՆ պետական քարտուղար Էնթոնի Բլինքենը Twitter-յան իր միկրոբլոգում կիսվեց հանդիպման արդյունքներով, նշելով. «Մենք աջակցում ենք Հայաստանին և Ադրբեջանին, որոնք համատեղ աշխատում են տևական և արժանապատիվ համաձայնության հասնելու ուղղությամբ։ Երկխոսությունը կայուն խաղաղության բանալին է»:

Ադրբեջանական լրատվամիջոցները հայտնում էին, որ կայացել է նաև Միրզոյան-Բայրամով հանդիպումը, սակայն քննարկման արդյունքների մասին դեռևս լռում է թե՛ ադրբեջանական կողմը, թե՛ հայկական: Բայց այն, որ ջերմ և ուրախ մթնոլորտը պահպանվում էր՝ դա հաստատ: 

ԱԳ նախարար Միրզոյանը մշտապես ժպտում, հրճվում է թուրք և ադրբեջանցի իր գործընկերների հետ հանդիպումների ժամանակ: Երևի ուրախ է՝ «խաղաղության» դարաշրջանը բառիս բուն իմաստով բացվում է ԱԹՍ-ների և ականանետերի ներքո: «Խաղաղության» շուրջ ընթացող բանակցությունների հետևանքով հայկական կողմն ունի 4 զոհ:

Եվ ինչպես միշտ՝ պաշտոնական ոչ մի բացատրություն... Սակայն հորդորը նույնն է՝ «հետևել պաշտոնական լրահոսին»... Այն պաշտոնականին, որ 44-օրյայի ընթացքում «Հաղթում» էր: 

Դե իսկ ընդդիմությունն էլ պինդ է և ամուր, բայց սոցհարթակներում... կամ էլ մուննաթ գալով, թե՝ եթե մեր «ֆանարիկները» չեն հավանում, «հելնեն» ուրիշներն անեն: 

Իսկ իշխանությունների խոստացված ապագան չի ուշանում, չի հապաղում. հերթով տներն է մտնում, բայց կյանքեր խլելով... 

NEWSPRESS.AM