Մի հետաքրքիր խոսք ուներ՝ «Հայաստանում «Բենթլիով» ընդդիմություն չի կարող լինել», տեսնես հիմա էլ է՞ այդպես մտածում. Բաբկեն Թունյան

Հայաստանում բավականին հայտնի քաղտեխնոլոգներից մեկը, որի հետ ժամանակին բավական հաճախ էինք մտքեր փոխանակում, մի հետաքրքիր խոսք ուներ՝ «Հայաստանում «Բենթլիով» ընդդիմություն չի կարող լինել»: Այս մասին իր ֆեյսբուքյան էջում գրել է ՔՊ-ական պատգամավոր Բաբկեն Թունյանը:

«Իմաստը հետևյալն է՝ եթե «Բենթլի» ունես, ուրեմն, ամենայն հավանականությամբ, հարուստ մարդ ես կամ խոշոր գործարար: Իսկ հարուստ մարդը կամ գործարարը չէր համարձակվի իշխանության հասցեին թթու խոսք ասել, որովհետև մի թեթև «քչփորելու» դեպքում կպարզվեր, որ հարստանալու պրոցեսն ուղեկցվել է քրեական պատմություններով, իսկ բիզնեսի համար կծագեին հետաքրքիր խոչընդոտներ բոլոր պետական մարմինների կողմից:

Արդյունքում, «Բենթլիով» ընդդիմադիրը պիտի հրաժարվեր կա՛մ ընդդիմադիր գործունեությունից, կա՛մ «Բենթլիից», իսկ որոշ դեպքերում՝ նաև ազատությունից:

Հիշեցնեմ, սա ոչ թե իմ խոսքերն են, այլ քաղտեխնոլոգի, ով հիմա մեր ամենաթունդ ընդդիմախոսներից է:

Ասածս ինչ է՝ տեսնես հիմա՞ էլ է այդպես մտածում)) Հատկապես, երբ տեսնում է, թե մեզ քննադատող, անգամ՝ հայհոյող մարդկանց պատկանող ընկերությունները ինչպես են հաղթում պետական մրցույթներում, օգտվում տարբեր աջակցության ծրագրերից կամ խոշոր պրոյեկտներ սկսում Հայաստանում»,-նշել է Թունյանը: