Լարված իրավիճակ՝ Երևան-Գյումրի ճանապարհին․ գյուղացիները փակել են ճանապարհը, պահանջում են մարզպետին

Երևան-Գյումրի ավտոճանապարհի՝ Կաքավաձոր գյուղի գլխավոր խաչմերուկը, ի նշան բողոքի, փակել են և պահանջում են, որպեսզի ժամանի Արագածոտնի մարզպետը։ Shamshyan.om-ի հետ զրույցում բողոքի ցույցի մասնակից գյուղացիներն ասել են․

«Արդեն տևական ժամանակ է՝ պատկան մարմինները խոստացել են, որ գյուղ մտնող 6 կմ-անոց ճանապարհը կվերանորոգեն։ 30 տարի է՝ սպասում ենք, թե մեր գյուղում էլ է արև ծագելու։ Բազմաթիվ անգամներ, երբ մարդ է վատացել, շտապօգնություն ենք կանչել, մարդիկ ասում են, որ չենք կարող գալ, քանի որ ամբողջ ճանապարհը մարդաբոյ փոսեր են։ Գյուղից մինչև հիվանդին տեղափոխում են այդ 6 կմ-անոց ճանապարհը 1,5 ժամ է տևում։ Եվ հարց է՝ հիվանդին կտեղափոխեն հիվադանո՞ց, թե՞ կտեղափոխեն մորգ։ Ստիպված ենք դիմում այդ ծայրահեղ քայլին, քանի որ հույս չունենք, թե մեր գրավոր դիմումներին կպատասխանեն։ Մեր համբերության բաժակը լցվել է։ Վարչապետ Նիկոլ Փաշինյանը հայտարարում է, թե հանրապետությունում մեծ թափ է հավաքել ճանապարհաշինարարությունը, բայց մեզ մոտ՝ ոչ մի շոշափելի արդյունք։

Խնդրում ու պահանջում ենք, որ էդ 6 կմ-անոց ճանապարհը վերանորոգեն։ Հիմա մեզ կմեղադրեն, թե 30 տարի ձեն չեք հանել, հիմա՞ որոշեցիք։ Մենք մեքենաների համար հարկ ենք մուծում, որ բարեկարգ ճանապարհով երթևեկենք, բայց ավտոները սաղ քանդվում են։ Էս ճանապարհը կարելի է Գինեսի գրքում գրել, որպես 1000-ից ավելի խրամատներ ունեցող հատված։ Չե՛նք բացելու ճանապարհն այնքան, մինչև մարզպետարանից չգան»։

Խցանումները 2 կողմից անցնում են մի քանի կմ-ը։ Ճանապարհ են տալիս միայն շտապօգնության և մանկահասակ երեխաներով ավտոմեքենաներին։