Ադրբեջանը շարունակում է իր քաղաքականությունը, որից երբեք չի էլ հրաժարվել, այդ տեսանկյունից նրանք «ազնիվ» թշնամիներ են․ Դավիթ Բաբայան․ «Իրավունք»

«Իրավունք» թերթը գրում է․ «Մինչ Վաշինգտոնում «խաղաղության պայմանագիր» էին քննարկում, Ադրբեջանը հերթական ռազմական ագրեսիան իրականացրեց, որի հետեւանքով հայկական կողմն ունեցավ չորս զոհ: Ի՞նչ իրավիճակ է Արցախում այս պահին: Կարո՞ղ ենք ասել, որ այսօրվա զարգացումները հայաստանյան իշխանությունների` ամեն գնով, այսպես կոչված, «խաղաղության» հասնելու ձգտումն է: Հարցի պատասխանը փորձել ենք ստանալ ԱՀ նախագահի խորհրդական Դավիթ Բաբայանից, ով փաստեց.

—Ադրբեջանը շարունակում է իր քաղաքականությունը, որից, իմիջիայլոց, երբեք չի էլ հրաժարվել եւ բացեիբաց ասում է, թե ինչ է ուզում: Սա շատ պարզ է, եւ այդ տեսանկյունից նրանք «ազնիվ» թշնամիներ են:

Ինչ վերաբերում է ամեն գնով խաղաղության գնալուն, ապա խաղաղության կարելի է գնալ միայն մեկ գնով. պետք է մենք ուժեղ լինենք, որովհետեւ խաղաղությունը հավասարակշռություն է: Երբ այն խախտվում է, բարեկամ համարվող երկրներն անգամ կարող են միմյանց դեմ պատերազմել: Բավական է տեսնել, թե ինչ է կատարվում աշխարհում:

Խաղաղությունը հենց այնպես չի լինում, դա քո երկրի ներուժի, բարոյահոգեբանական իրավիճակի հետեւանքն է: Մեր ամենամեծ վտանգը ներքին գործընթացներն են՝ անտարբերությունն Արցախի եւ ընդհանրապես` պետականության նկատմամբ: Կարծես թե բոլորը միայն իրենց մասին են մտածում: Սա խոսում է հասարակության մեջ ընթացող շատ խորը դեգրադացիոն գործընթացների մասին: Հետեւանքը՝ Ադրբեջանի ագրեսիան է: Այս կապը, եթե մենք հասկանանք, ճիշտ ըմբռնենք եւ փորձենք դրա դեմն առնել, ավելի հեշտ կլինի, իհարկե, ապահովել արտաքին ոլորտում պետության անվտանգությունը»:

Մանրամասները՝ թերթի այսօրվա համարում։