Այն մարդիկ, որոնք ծառայում են այս իշխանությանը, բոլորն օգնում են Արցախի և Հայաստանի հանձնմանը․ Տիգրան Աբրահամյան

«Աշոտյանը քաղաքական դաշտի մարտիկներից է, պայքար տվող տղա է, ապացուցել է իր կյանքով, կենսագրությամբ։ Այստեղ գտնվող մարդիկ եկել են՝ ասելու, որ պատրաստ են շարունակելու նրա գիծը։ Ազատություն Արմեն Աշոտյանին»։ Գլխավոր դատախազության դիմաց բողոքի ակցիայի ժամանակ հայտարարեց «Պատիվ ունեմ» խմբակցության քարտուղար Տիգրան Աբրահամյանը։

Նա ընդգծեց, որ Արմեն Աշոտյանին կալանավորելուն զուգահեռ տեղի են ունեցել կարևոր գործընթացներ: Տիգրան Աբրահամյանը հիշեցրեց, որ Աշոտյանի ձերբակալման հենց նույն օրն ադրբեջանցիները տոտալ բլոկադայի ենթարկեցին Արցախի Հանրապետությունը, հունիսի 15-ից Արցախ առաջին անհրաժեշտության ապրանքներ՝ վառելիք, պարեն որևէ ծավալով չեն մտնում։

«Արցախը 205 օր է՝ շրջափակման մեջ է, բայց այդ ընթացքում ռուս խաղաղապահներն ու Կարմիր խաչը կարողանում էին որոշակի քանակությամբ պարեն հասցնել Արցախ։ Իսկ այս ընթացքում Հայաստանի իշխանությունները սկսել են մարդաորս, զինվորական, քաղաքական գործիչների, պարզապես գիտակից մարդկանց նկատմամբ, որոնք սկզբունքային են, Նիկոլի ու նիկոլանմաների դեմքին ասում են այն, ինչ մտածում են, այն մարդկանց նկատմամբ, որոնք իրենց ջանքներն ուղղել են այս իշխանությունների ոչ հայանպաստ քաղաքականության դեմ»,- ասաց Աբրահամյանը։

Անդրադառնալով «Արցախն Ադրբեջան է» հայտարարության հեղինակներին՝ Աբրահամյանն ընդգծեց՝ դրանք այն մարդիկ են, որոնք վաղն իրենց ընտանիքի անդամին կարող են հանձնել թշնամուն։

«Բոլոր այն մարդիկ, որոնք ծառայում են այս իշխանությանը, բոլորն օգնում են Արցախի և Հայաստանի հանձնմանը»,- ասաց Աբրահամյանը։