Այդ փաստը բերելու ժամանակ հնարավոր չի լինելու հակափաստարկ բերել, Ադրբեջանը լուրջ խնդիրների առաջ է կանգնելու․ ի՞նչ նկատի ունի Օսկանյանը

Չմոռանանք, որ Արցախի ամբողջ ինքնորոշումն իրավական ընկալում և հիմք ստացավ ելնելով միայն այն փաստից, որ սովետական շրջանում Արցախն ուներ ինքնավար մարզի կարգավիճակ։ Դա հնարավորություն տվեց, որ 1991թ․-ին Արցախի ժողովուրդը ձգտի ինքնորոշման, հիմնավորի դա, անցկացնի հանրաքվե և հայտարարի իր հանրապետության մասին։ Այս մասին այսօր հղած տեսաուղերձում ասաց ԱԳ նախկին նախարար Վարդան Օսկանյանը։

Նրա խոսքով՝ այդ փաստն ընկալելի դարձավ միջազգային հանրության համար։ Առհասարակ Լեռնային Ղարաբաղը, Արցախն ուներ ինքնավար մարզի կարգավիճակ։ Ուստի, եթե այդ հանգամանքը հնարավոր եղավ մտցնել բանակցությունների օրակարգ, Օսկանյանը հավատացնում է, որ դա կտրուկ փոխելու է ընդհանուր գործընթացը։ 

«Ես 100% վստահ եմ, որ այդ փաստը բերելու ժամանակ հնարավոր չի լինելու հակափաստարկ բերել, քանի որ սա միջազգայնորեն ընդունված նորմ և գործընթաց է։ Եվ իհարկե, սա այն հարցն է, որ միջազգային հանրությունը կհասկանա և կընկալի։ Նույնիսկ նրանք սա կմտցնեն օրակարգ։ Սկզբում կբացատրեն, իսկ հետո կպարտադրեն Ադրբեջանին։ Իսկ եթե Ադրբեջանը դիմադրի և թույլ չտա, որպեսզի այն օրակարգ մտնի, ապա հավատացեք, որ Ադրբեջանը միջազգային իրավունքի տեսանկյունից լուրջ խնդիրների առաջ է կանգնելու։ Դա Ադրբեջանին ստիպելու է վերջիվերջո ընդունել, որ Արցախի ժողովուրդն իրավունք ունի ինքնորոշման»,- նշեց Օսկանյանը և հիշեցրեց միջազգային 3 օրենքները՝ բերելով օրինակներ։