Վարչական շրջանի ղեկավարը հինգ մեքենա ունի. ՊԵԿ նախկին պաշտոնյայի ունեցվածքը․ «Ժողովուրդ»
«Ժողովուրդ» օրաթերթը գրում է.
«2008-2022 թվականներին Պետական եկամուտների կոմիտեում տարբեր պաշտոններ զբաղեցրած Արմեն Մհերյանը, որն այժմ Նոր Նորք վարչական շրջանի ղեկավարն է, 2022 թվականին 1 մլն 900 հազար դրամով ավտոտնակ է վաճառել։
Տարվա վերջում նա ունեցել է մեկ բնակարան և մեկ ավտոտնակ, որոնք բոլորն էլ ձեռք են բերվել 2019 թվականին, երբ նա դեռ աշխատում էր ՊԵԿ-ում։ Մհերյանն իր պաշտոնին նշանակվել է անցյալ տարի: Այդ նույն տարում նա ձեռք է բերել «Մազդա» մակնիշի ավտոմեքենա և վճարել դրա համար 2 մլն 388 հազար դրամ, սակայն ունի նաև չորս այլ ավտոմեքենա, որոնք գնվել են տարբեր տարիներին։ Այսինքն՝ վարչական շրջանի ղեկավարն ունի հինգ մեքենա։
Մհերյանը բանկային հաշվին գումար չի ունեցել, կանխիկ ունեցել է 1 մլն 900 հազար դրամ և 35 հազար դոլար։ Մեկ տարվա ընթացքում նրա եկամուտը 13 մլն դրամ է եղել, որը գոյացել է աշխատավարձերից և գույքն օտարելուց ստացված եկամուտից։
Այս եկամուտների պայմաններում նա ունի նաև 62 մլն դրամի վարկ, որից 14 միլիոնը բնակարանի հիփոթեք է, իսկ մյուս տվյալները պաշտպանված են, մեզ հասանելի չեն»:
Առավել մանրամասն՝ թերթի այսօրվա համարում։
