Վրաստանում ավիատոմսերն ավելի էժան են, քան Հայաստանում. Կարեն Ճշմարիտյանը համաձայն չէ

«Մի կողմից դրական է, որ ունենք տնտեսական ակտիվության աճ, մյուս կողմից` կարող եմ նշել, որ դա բավարար չէ մեզ համար ցանկալի աճն ու արդյունքն ապահովելու համար:

Այսօր, ամփոփիչ ասուլիսի ժամանակ ՀՀ էկոնոմիկայի նախարար Կարեն Ճշմարիտյանը հայտնեց, որ Հայաստանը կարողացավ ցույց տալ, որ ի զորու է հաղթահարել ու դիմակայել տնտեսական անկման վտանգ պարունակող արտաքին բացասական ազդակների ազդեցությունը:

Երբ ասում են, թե Վրաստանում մի քանի անգամ ավիատոմսերն ավելի էժան են, քան Հայաստանում, պետք է ցույց տալ հաշվարկներով, հորդորեց լրագրողներին Կարեն Ճշմարիտյանն, արդարացնելով այն հանգամանը, որ բաց երկնքի քաղաքականությունը Հայաստանում չի հանգեցրել ավիատոմսերի սակագների էժանացմանը:

«Կան բազմաթիվ ուղղություններ, որտեղ Հայաստանից է ավելի էժան, ու կան ուղղություններ, որտեղ ավելի շատ Վրաստանից է էժան: Զուտ աշխարհագրորեն, երբ արևմուտքից արևելք ես գալիս, պետք է որոշակի տարբերություն լինի: Եթե Թբիլիսիից Դուբայ տոմսը լիներ ավելի էժան, քան Երևանից Դուբայը, հարց կառաջանար, կամ եթե նույն ավիակերոսինը տեղափոխվեր Իրանից, Հայաստանից, ոչ թե գար Բաթումիով, միգուցե նույն հարցն առաջանար։ Այսինքն` կան օբյեկտիվ հիմքեր, որ պետք է Հայաստանում տոմսի գինը մի քիչ ավելի թանկարժեք լինի: Մենք չենք ուզում, որ ինչ-որ մի ընկերության սուբսիդավորենք, քանի որ Վրաստանում 10 դոլար էժան է տոմսը»,-ասաց նա:

Դիտարկմանը, թե 10 դոլար չէ թանկ, գների տարբերությունը իրականում շատ ավելի մեծ է, նախարարը պատասխանեց. «Նախ, որպեսզի որոշեք, որտեղ է ավելի էժան ու թանկ, պետք է ստուգել համացանցով, ոչ թե հարևանի խոսքերին վստահել: Տոմսի գնի դեպքում կարևոր է ժամանակը, տոմսի կարգը, ավիաընկերությունը, այդ ժամանակվա ընթացքում ինչ ակցիաներ են իրականացնում ավիաընկերությունները, որքան է կազմում նավթի գինը: Այդ բոլոր գործոնները պետք է գրենք, նոր որոշենք, մասնագետներն անում են այդ աշխատանքը ու տարվա համար կհրապարակեն թվեր: Բայց նման բաները բաց երկնքի քաղաքականության հետ մի կապեք ու նայեք և համեմատեք մեկ տարի առաջ գները ու հիմա»,-ասաց նա: