Բնակիչները վճարում են համատիրությանը գործ չանելու համար

«Ուր են գնում մեր սպասարկման վարձավճարները, եթե ոչ մի գործ շենքում չի արվում»,- newspress.am-ին այս խնդրով ահազանգել են Քանաքեռ-Զեյթուն վարչական տարածքի «Մուշ» համատիրության բնակիչները: Նրանք պատրաստվում են բողոքի ակցիա կազմակերպել և պահանջել համատիրության նախագահից կամ իրենց գումարները վերադարձնել, կամ էլ վերջապես զբաղվել շենքի բարեկարգման հարցերով:

Չնայած բնակիչների բողոքներին, համատիրության նախագահ Ռոզա Սարգսյանը մեզ հետ զրույցում վստահեցնում էր, որ աշխատանքներ կարտարվում են:

«Ես ի՞նչ անեմ, որ իրենք չեն տեսել: Հո մենք բոլորին չե՞նք կանչում ու ցույց տալիս, թե ոնց ենք աշխատում: Ովքեր մեր կատարած աշխատանքերի ժամանակ բակում են եղել, նրանք կարող են ասել` աշխատել ենք, թե ոչ»,- փորձում էր արդարանալ Ռոզա Սարգսյանը:

Սակայն հարկ է նկատել, որ բնակիչները ոչ միայն աշխատանքի ընթացքին ներկա չեն գտնվել, այլև ընդհանրապես չեն տեսել այդ աշխատանքի արդյունքը, ինչն էլ դժգոհության առիթ է դարձել:

Համատիրության նախագահի խոսքով ամեն ամիս յուրաքանչյուր շենքից հավաքագրվում է 100-120 հազար դրամ: Այս գումարով նախատեսվում է հոգալ ոչ միայն բնակելիների խնդիրները, այլև համատիրության աշխատակիցների ծախսերը, որի մեջ մտնում է գրասենյակի ծախսերն ու իհարկե աշխատավարձը:

Այս ֆոնին արդեն տրամաբանական է, որ բնակիչները կդժգոհեն, քանի որ բարեկարգման համար ոչինչ չի մնում:

Համատիրության բազմաբնակարաններում վերելակներից յուրաքանչյուրը 3 տասնյակից ավելի վաղեմություն ունի:
Թեև Ռոզա Սարգսյանը փորձում էր վստահեցնել, որ վերելակների վրա մեծ ծախսեր են արվում, որը հասնում է 170 հազար դրամի, որպեսզի ապահովեն բնակիչների անվտանգ շարժը վերելակով, սակայն զրույցի մեջ, իր համար աննկատ խոստովանեց, թե շենքում մասնագետ ունեն, հենց վերելակում մարդ է մնում գալիս մի կերպ հանում է:
Հարցին, թե շատ են դեպքերը, երբ բնակիչները մնում են վերելակում` վրդովված պատասխանեց. «Բայց ո՞ր շենքում մարդիկ չեն մնում վերելակի մեջ, էդպիսի մարդ լինո՞ւմ ա… դե ասացեք, դուք շենք գտե՞ք, որ վերելակում մարդ չմնա՞, դե ասեք…»,- չէր հանգստանում համատիրության նախագահը:

Այստեղ կրկին հարց է առաջանում, ո՞ւմ և ինչո՞ւ պետք է սեփականատերը մուծի իր բնակարանի քառակուսու համար, եթե բազմաբնակարան շենքերը հիմնականում շարունակում են «կառավարվել» ինքնաբերաբար: