Ամեն անգամ գալիս եք, մեկի ասածի վրա կեղտ եք բռնում․ մարզպետ եք եղել, բա էն ժամանակ ձեն հանեիք․ ՔՊ-ականը՝ ընդդիմադիր պատգամավորին

ԱԺ «Հայաստան» խմբակցության պատգամավոր Արթուր Խաչատրյանը ոռոգման հետ կապված հարց է ուղղել նախարարությանն ու պատասխան չի ստացել։ Նրան հետաքրքում է, թե որքան ջուր է բաց թողնվել մինչև ոռոգման սեզոնը։

ԱԺ նիստում՝ «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագծի քննարկման ժամանակ, նա նկատեց, որ կառավարությունը սխալ ուղով է գնում, ջրի կառավարումը սկզբունքորեն սխալ է անում։

«Երբ ես Շիրակի մարզպետ էի, Կապսի ջրամբարի կառուցման համար սկսել էին աշխատանքները, բայց միայն հինգ տարի անց է պայմանագիր կնքում իշխանությունը»,-ասաց Խաչատրյանը։

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանին դուր չեկավ Արթուր Խաչատրյանի շեշտադրումը։

«Ես էլ կարող եմ Ձեր պես էմոցիոնալ ասել՝ ջրամբարներում պետք է ջուր լիներ, դե թող լիներ»,- ասաց նա։

ՔՊ-ական պատգամավոր Մաթևոս Ասատրյանն էլ հակադարձեց ընդդիմադիր պատգամավորի պնդումներին։

«Բա Դուք եղել եք նախկին մարզպետ, Ձեր ժամանակ հազարավոր կիլոմետրերի խողովակ գետնի տակից հանեցին, ծախեցին, տո Դուք եք եղել, բա այդ ժամանակ հելնեիք, խոսայիք, 30 տարի մի հատ ջրամբար չեք կառուցել։ Այսօր եկել ենք ջրամբար ենք կառուցում, ոռոգման ջրի ցանցեր ենք փոխում։ Այո, ձեր թողած ժառանգության համար մենք դեռ շատ ենք ձախողելու, դեռ շատ խնդիրներ ենք ունենալու։

Ամեն անգամ գալիս եք, մեկի ասածի վրա կեղտ եք բռնում։ Միայն Ապարանի տարածաշրջանից հազարավոր կիլոմետրերի խողովակ հանեցին, տարան, էն գյուղապատերը, որոնք ընդդիմանում էին, բռնում, տանում, փակում էին, որ ձեն չհանեն»,- հայտարարեց պատգամավորը՝ հավելելով, որ խողովակները տարել են որպես ուտիլ են հանձնել։