Ավինյան, եթե էս աղբարկղերի հարցը չլուծեցիր, աղբով լի տոպրակներով քո աշխատասենյակ ենք գալու․ Արիանա Հովսեփյան

Մի քանի օր առաջ, ինձ պատկանող NEWSPRESS.am կայքն անդրադարձել էր Կենտրոնում աղբարկղերի բացակայության խնդրին։ Կոնկրետ մեր շենքում կան տարեց կամ վատառողջ մարդիկ, ովքեր միայն աղբ թափելու համար ստիպված են բավականին տարածություն անցնել՝ աղբով լցված տոպրակներով։ 

Պատկերացրեք, թե մի տոպրակ աղբ թափելու համար այդ մարդիկ որքան են գնալու՝ աղբամանի հասնելու համար։ Այսինքն՝ աղբով լի տոպրակը ձեռքին անցնելու են մեկ-երկու թաղամասով։

Հիմա դիմում եմ որպես քաղաքապետ ժապավեններ կտրող ու ֆոտոսեսիաներ անող, բայց դեռ տակավին փոխքաղաքապետ Տիգրան Ավինյանին․ Ավինյա՛ն, դու աղբը քո կնոջ ձեռքը կտա՞ս, որ էդ տոպրակները ձեռքին թաղեթաղ ընկնի ու աղբաման գտնի՝ աղբը թափելու համար։

Իհարկե, չես անի։ Բա այդ դեպքում հաջորդ հարցը․ ինչի՞ ես էս մարդկանց՝ առանց այն էլ հոգսաշատ կյանքը դժվարացնում։

Հիմա կարող ես հեքիաթներ պատմել, թե աղբատարները բակեր չեն կարողանում մտնել, դժվար է սպասարկել բակ առ բակ, բայց ասեմ, որ դրանք ուղղակի կեղծ պատճառաբանություններ են։

Նախ, բոլոր բակերն էլ մեծ մեքենաներ մտնում են, բայց եթե անգամ չմտնեին՝ գոյություն ունի այլ տարբերակ․ բոլոր աղբամաններն ունեն անիվներ, և դրանք շատ հեշտ է տեղաշարժելը։ Ընդամենը պետք է աղբարկղերը մոտեցնել մեքենային, ու հարցը կլուծվի։

Հաշվի առնելով այդ ամենն ու նաև այն, որ լուծման տարբերակ եմ առաջարկել՝ քեզ ժամանակ եմ տալիս։ Ավինյան, եթե աղբարկղերի հարցը չլուծեցիր՝ շենքի բնակիչներով, աղբով լի տոպրակներով, քո աշխատասենյակ ենք գալու։

Մտածիր։ Ժամանակը գնաց։

Արիանա (Արմենուհի) Հովսեփյան