Ալաշկերտը չկարողացավ օգտագործել մեծ առավելությունը․ Ալաշկերտ – Արսենալ Տիվատ՝ 1։1

Կոնֆերենցիաների լիգայի որակավորման առաջին փուլում Երևանի «Ալաշկերտը» դիմակայության առաջին խաղում ոչ-ոքի խաղաց Մոնտենեգրոն ներկայացնող «Արսենալ Տիվատի» հետ։ Թիմերը փոխանակեցին մեկական գնդակ։

Թիմերն ակտիվ սկսեցին խաղը։ 10-րդ րոպեին հյուրերը տուգանայինի մատույցներում կոպիտ խաղացին։ Նշանակված տուգանայինը երևանյան ֆուտբոլիստները չկարողացան լավագույնս օգտագործել։ Րոպեներ անց Դավիդ Խուրցիձեն ընթացքից հարված կատարեց, սակայն գնդակը փոքր շեղությամբ դուրս եկավ դիմային գծից, գրում է Armsport-ը։

20-րդ րոպեին «Ալաշկերտը» հաշիվը բացելու լավ հնարավորություն ուներ, սակայն Ռասինեսի հարվածից հետո մրցակցի դարպասապահը հեռացրեց գնդակը։ 23-րդ րոպեին հյուրերը բացեցին հաշիվը։ Գոլի հեղինակ դարձավ Խուլիան Մոնտենեգրոն։

Բաց թողած գոլից հետո հայկական թիմը ամբողջովին տիրեց նախաձեռնությանը ու մի քանի անգամ կարող էր գրավել մրցակցի դարպասը, սակայն չէր ստացվում վերջին հարվածը։ 43-րդ րոպեին Եդիգարյանի հեռահար հարվածից հետո հյուրերի դարպասապահը գնդակը հանեց անկյունային։ Երկու րոպե անց Եդիգարյանը վրիպեց նպաստավոր դիրքից։

Երկրորդ խաղակեսի մեկնարկից տանտերերը նետվեցին առաջ։ 50-րդ րոպեն Ագդոն Մեզեսը գրավեց մրցակցի դարպասը, սակայն մրցավարն արձանագրեց խաղից դուրս վիճակ։ 60-րդ րոպեին Դավիդ Խուրցիձեի հարվածից հետո դարպասապահը գնդակը հանեց անկյունային։

61-րդ րոպեին Վիտալի Ուստինովը հեռվից կատարած հարվածով հավասարեցրեց հաշիվը։ Խփած գոլից հետո Վահե Գևորգյանի թիմը շարունակեց ճնշում գործադրել, սակայն հաշվի մեջ փոփոխություն չեղավ։

Պատասախան խաղը կկայանա մեկ շաբաթ անց։