Որպես անկառավարելի դասախոս՝ հավանաբար, ես ձեռնտու չէի իմ ղեկավարությանը. Գևորգ Պետրոսյանը՝ իրեն ԵՊՀ-ից հեռացնելու պատճառների մասին

ԵՊՀ դասախոս, նախկին պատգամավոր Գևորգ Պետրոսյանն այսօր ֆեյսբուքյան իր էջում տեղեկացրեց, որ առանց պատճառի զրկվել է աշխատանքից՝ այլևս չի դասավանդելու ԵՊՀ-ում: 

Կատարվածի մասին NEWSPRESS.am-ի հետ զրույցում Պետրոսյանը նշեց.

«Ես այսօր տեղեկացա, որ ինձ այլևս ժամեր չեն տրամադրվել, դա նշանակում է, որ համալսարանն ինձ հետ լուծում է աշխատանքային պայմանագիրը՝ ինձ համար անհայտ պատճառներով: Եթե մենք նկատի ունենանք այն, որ Հայաստանն այն երկիրն է, որ պետք է կատարի իր ստանձնած միջազգային պարտավորությունները, մասնավորապես` Հայաստանի վավերացված սոցիալական, տնտեսական և մշակութային իրավունքների մասին միջազգային դաշնագրի 7-րդ հոդվածը: Պետությունն այդպիսի պարտավորություն ունի՝ ապահովել մասնագետների առաջխաղացումն ըստ մասնագիտական ունակությունների, արժանիքների, նաև Աշխատանքային օրենսգրքի 6-րդ հոդվածն ավարտվում է այն նախադասությամբ, որ աշխատանքային հարաբերությունները կարգավորելիս, կողմերը պարտավոր են ղեկավարվել ազնվության, արդարացիության և ողջամտության սկզբունքներով»,- ընդգծեց նա: 

Պետրոսյանը շեշտեց, որ ինքը Հայաստանի Հանրապետությունում աշխատանքային իրավունքի գծով միակ դոցենտն է՝ ամենաբարձր որակավորում ունեցող մասնագետը:

«27 տարի դասավանդում եմ ԵՊՀ-ում, երբևէ իմ աշխատանքային ստաժը չի ընդհատվել, այդ թվում՝ իմ՝ բարձրաստիճան պետական պաշտոններ զբաղեցնելու ընթացքում: Միանձնյա հեղինակել եմ «Հայաստանի Հանրապետության աշխատանքային իրավունք» դասագրքի ընդհանուր և հատուկ մասերը, 50-ից ավելի գիտական աշխատանքի հեղինակ եմ: Եվ այսօր, առանց պատճառի, ես զրկվում եմ աշխատանքից»,- ասաց Պետրոսյանը:

Գևորգ Պետրոսյանը մեզ տեղեկացրեց նաև, որ հիմա պատրաստվում է գրավոր դիմում ներկայացնել ռեկտորին՝ գրավոր հայտնել իրեն աշխատանքային հարաբերությունները դադարեցնելու պատճառը և իրավական հիմքը: Նա վստահություն հայտնեց, որ բուհը չի կարողանալու մատնանշել պատճառ և իրավական հիմք:

«Մինչդեռ ՀՀ Սահմանադրության 57-րդ հոդվածի 2-րդ մասի համաձայն՝ գործատուի նախաձեռնությամբ պայմանագիրը չի կարող լուծվել առանց հիմնավոր պատճառի: Նույնը նշված է նաև վերանայված եվրոպական սոցիալական խարտիայի 24-րդ հոդվածում, որտեղ խարտիան պետությանը պարտավորեցնում է, որ մարդն աշխատանքից ազատվի բացառապես հիմնավոր պատճառներով»,- ընդգծեց մեր զրուցակիցը: 

Ինչ վերաբերում է տեղի ունեցած պատճառներին, ապա Պետրոսյանը երկու վարկածի մասին խոսեց: 

«Ես ունեմ իմ վարկածները. առաջինը՝ քաղաքական հետապնդում, որովհետև իմ քաղաքական կեցվածքը հաճելի չէ իշխանության քիմքին: Երկրորդը, որին ավելի շատ եմ հակված՝ ներքին համալսարանական պայմանավորվածությունների հետևանք է, որովհետև ես այն դասախոսներից մեկն եմ, որը կամակատար չէ, որը կուրորեն չի կատարում ղեկավարության հանձնարարությունները և ղեկավարվում է առաջնային արժեքները պահպանելու սկզբունքով, որ թաթախված չէ կոռուպցիայի մեջ, ուսանողների հանդեպ ունի առանձնակի վերաբերմունք և այդ վերաբերմունքը դրսևորվում է ըստ գիտելիքի սկզբունքով: Որպես անկառավարելի դասախոս՝ հավանաբար, ես ձեռնտու չէի իմ ղեկավարությանը, հետևաբար, իրենք համատեղ ջանքերով հասան այս արդյունքին»:

Նա նշեց, որ թեև չի բացառում նաև քաղաքական հետապնդումը, սակայն, իր խոսքով, հանուն ճշմարտության, հավելեց, որ ներֆակուլտետային գործողությունների վարկածին ավելի է հակված, քան քաղաքական: 

«Հիմա գրավոր կպահանջեմ ազատման հիմքերը, հետո դիմելու եմ դատարան: Խնդիրն աշխատավարձը չէ, ես ընդամենը 38 հազար դրամ եմ ստանում՝ այն դեպքում, երբ անգրագետ նախարարները 1.5 միլիոն դրամ են ստանում: Խնդիրն արդարության սկզբունքն է. 27 տարվա դասախոսին, երկրում միակ գիտությունների թեկնածու- դոցենտին, միանձնյա դասագրքերի հեղինակին (նման բան քիչ է եղել Հայաստանի իրավագիտության պատմության մեջ) հեռացնում են աշխատանքից: Այս պայմաններում, առանց մարդուն լսելու, ընդամենը կողմնակի աղբյուրներին տեղյակ պահելով, որ դու այլևս դասախոս չես, սա է վիրավորանքը: Ես այդ վիարվորանքը չեմ տանում, միշտ արժանի հարված եմ հասցնում, և իրենք այդ վիրավորանքը կտեսնեն»,- եզրափակեց Պետրոսյանը:

Զրուցեց Աստղիկ Հովհաննիսյանը