Եթե ձեր տան դուռը փակվի՝ 3-4 ժամ չեք կանգնի, կկոտրեք դուռն ու կմտնեք․ ես ուզում եմ այ էդպես մտնենք մեր հայրենիք՝ Արցախ․ դա մերն է․ Գայա Արզումանյան (տեսանյութ)

«Մենք հայրենիք ենք կորցնում։ Ես ոչ մի բան չեմ ակնկալում, այլ պինդ ասում եմ՝ Արցախն արցախցունն է»։ Երևանում ՌԴ դեսպանատան ակցիայի ժամանակ ասաց արցախցի երգչուհի Գայա Արզումանյանը։

Նա ուզում է, որ իր տան դուռը բացվի ու գնա հայրենիք, ծնողին գրկի, համբուրի ու ասի՝  բարև, պապ, մամ։

Եթե ձեր տան դուռը փակվի՝ 3-4 ժամ չեք կանգնի, կկոտրեք դուռն ու կմտնեք․ ես ուզում եմ այդ էդպես մտնենք մեր հայրենի՝ Արցախ․ դա մերն է, դա իմն է»,- ասաց նա։ 

Գայա Արզումանյանի համոզմամբ՝ հիմա պետք է միլիոնավոր մարդիկ կանգնած լինեին իրենց տան, հողի համար։

«Եթե ես կարողանամ որպես մի անձ բացեմ Լաչինի միջանցքը, շուտվանից այն բաց կլիներ։ Ափսոսում եմ, որ իմ հորից լավ տղա չի ծնվել, այլ լավ աղջիկ է ծնվել, որ լավ տղա լինեի, կարող է մի քիչ այլ ձև վարվեի այս ամենին, այս ամենը այլ ձև կտեսնեի»,- ասաց երգչուհին։

Նա ցավով արձանագրում է, որ մեր տղերքի թափած արյան համար մենք այսօր չենք կարողանում պատասխան տալ մեր թշնամուն։

«Ինչ-որ մեկը որոշել է գալ, այնտեղ ինչ-որ բան դնել, նստել, մենք էլ սուս ու փուս նայե՞նք, ասենք՝ լա՞վ եք արել, շատացրե՞ք, փակե՞ք, տեսնենք՝ մեր հայրենակիցները ո՞նց են ցեղասպանության ենթարկվում։ Արցախում բնակվողները Հայաստանից սպասում են՝ միշտ իրար կողք լինել, հայը հայի կողքը պետք է միշտ կանգնած լինի։ Առանց Արցախ չկա Հայաստան։ Ինձ չի թվում, որ մենք կարող ենք այդպես ապրել»,- ասաց Գայա Արզումանյանը։