Վանաձորի «OK» մարկետում «Nestle» շոկոլադե սալիկների մի խմբաքանակ կծու է եղել․ ահազանգ

NEWSPRESS.am ի խմբագրությունն ահազանգ է ստացել Վանաձորից։ Մեզ ահազանգած քաղաքացին բողոքում էր, որ Վանաձորի «OK» մարկետից, որը գտնվում է Դիմաց թաղամասում, ձեռք է բերել անորակ սնունդ։

Իսկ ավելի կոնկրետ, երեխաների համար գնել է «Nestle» ապրանքանիշի պնդուկ ու չամիչով շոկոլադե սալիկ, որը պարզվել է, ոչ ավել-ոչ պակաս, կծու է։

«Երեխեքի համար առանք, կերան, ասեցին՝ կծու է․ անկեղծ ասած՝ չհավատացինք, ծիծաղեցինք։ Հետո, երբ էլի ասացին, մենք էլ փորձեցինք ու տեսանք, որ իրոք կծու է։ Իմ կյանքում նման բան չէի տեսել»,- մեզ հետ զրույցում պատմում է խմբագրություն զանգած կինը։

Նա իհարկե հասկանում է, որ խանութի  վաճառողները հատ-հատ չէին փորձել ստացած ապրանքն ու հնարավոր է` չգիտեն կատարվածի մասին։ Ավելին՝ չի բացառվում, որ հնարավոր է այդ խմբաքանակը հայտնվել է նաև այլ խանութներում, այնտեղ էլ խնդրին ծանոթ չեն։ Բայց նաև նա ուզում է  զգուշացնել, որ կա անորակ խմբաքանակը և, «Nestle» գնելիս, հարկավոր է ուշադիր լինել՝ այն երեխաներին տալուց առաջ։ 

«Չհասկացանք` ինչ անհասկանալի ծագման սնունդ էր ու ինչի էր կծու, բայց պետք ա պարզել, որ մարդիկ իմանան»,- ասաց մեր զրուցակիցը։

Հետաքրքիր է նաև այն հագամանքը, որ մինչ այդ կարծես ոչ ոք չի բողոքել քաղցրավենիքի կծու համից, ու մարկետը շարունակում  վաճառել այն։

Ամեն դեպքում, ակնկալում ենք պատկան մարմինների արձագանքը ու պահանջում ապրանքի ցուցանմուշի լաբորատոր հետազոտություն։

Արմինե Մկրտումյան