Հայաստանում շատերը չեն պատկերացնում` ինչ վիճակ է Արցախում, շատերը չեն էլ ուզում լսել այդ մասին. Էդիկ Բաղդասարյան

Եվրոպական երկրներում շատ բան չգիտեն Արցախի մասին, չգիտեն, որ այնտեղ ապրում են ազատ մարդիկ, եւ այնտեղ ապրողները իրենցից տարբերվում են միայն նրանով, որ ուզում են իրենք էլ ազատ ապրեն: Այս մասին իր ֆեյսբուքյան էջում գրել է «Հետքի» գլխավոր խմբագիր Էդիկ Բաղդասարյանը։

«Հայաստանում շատերը չեն պատկերացնում, թե ինչ վիճակ է Արցախում, շատերը չեն պատկերացնում, որ երեխաները կիսասոված են, որ տուն կա, որտեղ միայն հաց են ուտում: Ու գիտե՞ք՝ ինչն է սարսափելին, որ շատերը չեն էլ ուզում լսել այդ մասին, չեն էլ ուզում պատկերացնել այդ վիճակը:

Եվրոպական երկրներում շատ բան չգիտեն Արցախի մասին, չգիտեն, որ այնտեղ ապրում են ազատ մարդիկ, եւ այնտեղ ապրողները իրենցից տարբերվում են միայն նրանով, որ ուզում են իրենք էլ ազատ ապրեն: Այո, Արցախում հանգիստ կարող են քննադատել իրենց պաշտոնյաներին, ազատ արտահայտել իրենց կարծիքը: Իսկ Եվրոպան շատ լավ գիտի, որ Ալիևը ամենակոռումպացված լիդերներից մեկն է աշխարհի: Ալիեւյան կլանը թալանում է երկիրը, բնական ռեսուրսներից ստացված գումարները հիմնականում հոսում են Ալիեւների եւ նրա կնոջ՝ Փաշաեւների կլանների հաշիվներին, դառնում անշարժ գույք, ակտիվներ աշխարհի տարբեր ծայրերում: Ալիեւին քննադատողները սպանվում են, հայտնվում բանտերում: Ու Եվրոպան այժմ, առանց որեւէ երաշխիքի, ասում է՝ դուք, արցախցիներ, պետք է ենթարկվեք Ալիեւին, դառնաք նրա ստրուկը, գնացեք հետը քննարկեք եւ որոշեք, թե ինչպիսի ստրուկ եք լինելու: Եվրոպան իր գազի դիմաց պատրաստ է 120 հազար մարդու ուղարկել ստրկության, մահվան կամ հայրենազրկման: Ահա այն երեք ճանապարհները, որ առաջարկում է Եվրոպան ադրբեջանական գազի դիմաց: Նիկոլ Փաշինյանը, այսինքն՝ Հայաստանը, միացել է Եվրոպայի այդ պահանջին: Ռուսաստանն էլ շարունակում է իր գազը Ադրբեջանի միջոցով վաճառել Եվրոպային:

Ռուսաստանը, որ իբրեւ իր խաղաղապահներով պիտի ապահովեր Հայաստանի հետ կապող միջանցքի անխափան աշխատանքը, սնունդ է տանում ուղղաթիռներով միայն իր զինվորների համար, երբ իրենցից մի քանի հարյուր մետր հեռավորությամբ գտնվող երեխաները սոված են: Ահա այսպիսին է 21-րդ դարի աշխարհը: Ու Արցախը մեն-մենակ է»,- գրել է նա: