Շատ ցածր ու մտահոգիչ է շարունակում մնալ ագրարային ուղղությամբ ընդունելությունը. նախարար

Հայաստանի բուհերում ընդունելության համար այս տարի հատկացված 15 հազար 984 վճարովի տեղերից ընդունելություն իրականացվել է 7242-ի չափով, այսինքն՝ 45.3 տոկոսով:

Կառավարության նիստում վարչապետի խնդրանքով ԿԳՄՍ նախարարը ներկայացրեց ընդունելության քննությունների հիմնական փուլի արդյունքները: Հուլիսի 19-ից ընդունվում են նաև դիմումներ լրացուցիչ փուլի շրջանակներում:

«Այս տարի մեր դիմորդների թիվը 13 հազար 314 էր, որը համադրելի է նախորդ 2 տարիների թվի հետ: Ընդունվածների ընդհանուր թիվը 9147 է, ինչը կրկին համադրելի ցուցանիշ է նախորդ տարիների հետ: Անվճար տեղերի թիվը եղել է 2128, անվճար ընդունվել են 1782-ը, որը 83.7 տոկոսն է: Վճարովի տեղերը հատկացված են եղել 15 հազար 984-ի չափով, ընդունելությունն իրկանացված է 7242-ի չափով: Սա, իհարկե, շատ ցածր ցուցանիշ է՝ 45.3 տոկոսը, և սա նորություն չէ»,-ասաց նախարարը՝ հավելելով, որ սա ներառում է և պետական, և ոչ պետական բուհերի ցուցանիշները:

Օրինակ ոչ պետական բուհերի պարագայում հատկացված է եղել 3700-ից ավելի տեղ, ընդունելը եղել է շուրջ 3 տոկոս: Նախարարը նկատեց՝ ոչ պետական բուհերում գրեթե ընդունելություն չի իրականացվում:

Նա ներկայացրեց որոշ մտահոգիչ ցուցանիշներ ևս: Շատ ցածր ու մտահոգիչ է շարունակում մնալ ագրարային ուղղությամբ ընդունելությունը, Ագրարային համալսարանում հատկացված տեղերի ցուցանիշով ընդունելությունը կազմում է ընդամենը 7 տոկոս: Անդրեասյանը շատ մեծ աշխատանքի կարիք է տեսնում այս ուղղությամբ:

«Մենք պետք է արձանագրենք, որ մեր բուհական համակարգը խորը համակարգային, բովանդակային ճգնաժամի մեջ է: Եվ կառավարության պարտքն է այդ ճգնաժամը հաղթահարել: Լավ լուրն այն է, որ կառավարությունն ունի ծրագիր, թե ինչպես հաղթահարել այդ ճգնաժամը: Հաջորդ լավ լուրն այն է, որ այդ ծրագիրը սկսել է իրագործվել: Խոսքն Ակադեմիական քաղաքի ծրագրի մասին է»,-ասաց Փաշինյանը: