Ռուսական շուկայի սպասելիքներն ու հայկական պանրի արգելքը

Հայաստանից այս պահին պանիր չի արտահանվում Ռուսաստան: Այս մասին newspress.am-ին ասաց Հայաստանի պանրագործների միության նախագահ Արմեն Գրիգոյանը:

Հիշեցնենք, որ կապված Հայաստանում դաբաղի անկայուն իրավիճակի հետ, Ռուսաստանի Դաշնությունը արգելել է կաթնամթերքի,այդ թվում պանրի և մսամթերքի ներկրումը Հայաստանից:

Մինչ դեռ ԵՄ-ին միանալուց հետո ամագորգոռ խոսում էին, թե եվրոպական շուկան Հայաստանի համար անհասանելի է, իսկ ահա ռուսական շուկան կթանի մեր տնտեսության զարգացմանը: Մյուս կողմից էլ վստահություն կար, թե հայկական մթերքների որակի բարձրացում կլինի, քանի որ Հայաստանի շուկան փոքր է, իսկ ինչ արտադրում են` իրացվում է, որակը գրեթե չի ստուգվում:

Մթերքի որակը կապված է ոչ միայն անբարեխիղճ արտադրողների, այլ նաև սպառողների պահանջկոտության ցածր մակարդակի հետ, քանի որ որակ ասվածը մինչ այժմ հասկացվել է պիտանելիության ժամկետ ստուգել և ուրիշ ոչինչ:

Որպեսզի խնդիրը մերկապարանոց չհնչի, նշենք, որ երշիկեղենում օգտագործում են կամ արտերկրից ներկրած կասկածելի սառեցրած միս, կամ տեղական իրացման համար ոչ պիտանի մսեղիք, կաթնեղենում բարձր է կաթի փոշու մակարդակը, հացամթերքում շատ են օգտագործվում այսպես կոչված հետ «վիտամիններ», լայն տարածում ունի Հնդկաստանից ներկրված գոմեշի միսը, որը որևէ կերպ չի երևում պիտակների վրա:

Իսկ Եվրասիական տնտեսական միությանը միանալուց հետո արդեն, տնտեսագետները կարծիք էին հայտնում, որ մեր պարենամթերքի որակը առանձնապես չի փոխվի, քանի որ ԵԱՏՄ շուկան ևս եվրոպական չափանիշներով չի առաջնորդվում, ունի սեփական չափանիշները, որոնք բավականին ներողամիտ են որակի նկատմամբ:

Եվ քանի որ հայրենի սննդամթերքի որակը չի անցնում որակի փորձաքննություն, կամ էլ անցնում է միայն թղթի վրա, ապա սպառողները հաճախ են բողոքում, որ կաթին ջուր է խառնած, թթվասերը թթվասերի նման չէ, հացաբուլկեղենը արհեստականորեն փքված է, գինին իսկական չէ, պանրից բրինձի համ է գալիս, իսկ գնված սննդի մեջ հաճախ կարելի է հանդիպել մանր-մունր սողացողների կամ էլ զանազան իրերի բաղադրամասեր:

Նման ցածրորակ սննդամթերք Հայաստանում իրացնելն ավելի հեշտ է, քան արտահանել: Դրսում պարզապես հիմար չեն:
Իհարկե կան խելացի արտադրողներ, ովքեր որակյալ սննդամթերք են արտադրում և արտահանում են, կան նաև, որ միայն արտահանվող սննդամթերքն են որակյալ արտադրում:

Ինչ էլ որ լինի, մեկ անգամ չէ, որ բարձրաձայնվել է, թե սննդամթերքի շուկան անվստահելի է:

Սննդամթերքի արտադրության ոլորտը որակի, և ընդհանրապես սանիտարահիգիենիկ պայմանների ստուգման խնդիր ունի: Կարող են պատասխանել, որ ստուգում են, այո, ստուգում են, բայց միայն թղթի վրա: