ՀՀ-ն ԼՂ-ի ժողովրդի ճակատագիրը չի կարող որոշել, քանի որ ԼՂ-ի ներկայացուցիչները պետք է բանակցության կողմ լինեն․ Փաշինյան

Մեր կարծիքով՝ ՀՀ-ն Լեռնային Ղարաբաղի ժողովրդի ճակատագիրը չի կարող որոշել` այն տրամաբանությամբ, որ ԼՂ-ի ներկայացուցիչներն իրենք պետք է լինեն բանակցությունների, խոսակցության, երկխոսության կողմ։ Մենք հենց այդ որոշումն ենք առաջ մղում։ Նկատի ունենալով, որ ԼՂ-ի ժողովրդի իրավունքներն ու անվտանգությունը պետք է քննարկվեն ԼՂ-ի ներկայացուցիչների մասնակցությամբ՝ Բաքու-Ստեփանակերտ երկխոսության ֆորմատով՝ միջազգային մեխանիզմի շրջանակներում։ Այս մասին այսօր կայացած ասուլիսի ժամանակ ասաց Նիկոլ Փաշինյանը, որն ընդամենը 2,5 տարի առաջ Արցախի անունից, միանձնյա, ստորագրությամբ հանձնեց Արցախից շրջաններ, որոնք նույնիսկ իր վարած պատերազմի արդյունքներով մնացել էին ՊԲ վերահսկողության տակ: 

Փաշինյանն այն կարծիքին է, որ ԼՂ-ի (նկատի ունի Արցախի Հանրապետությունը-NEWSPRESS.am) ներկայացուցիչները, ժողովուրդը, կառավարությունը այս բանաձևի շրջանակներում հնարավորություն կունենան հասցեագրել իրենց հուզող հարցերը։ Այսպիսով ոչ միայն հարցեր առաջադրել, բովանդակություն գեներացնել, այլև կրել այդ բովանդակության քաղաքական պատասխանատվությունը։

«Ես կարծում եմ՝ դա է ճիշտ ճանապարհը»,- նշեց Փաշինյանը։ 

Հարցին, թե քանի դեռ ՀՀ-ն է բանակցում, ապա հնարավո՞ր է ՀՀ-ն կարողանա որևէ փոփոխություն մտցնել օրակարգ։ Ի պատասխան Փաշինյանը նշեց․ 

«Եթե չեմ սխալվում՝ ես նախկինում էլ հայտարարել եմ, որ մտածելու հարց է՝ արդյոք Հայաստանի և Ադրբեջանի միջև հնարավոր «խաղաղության պայմանագրի» (չակերտները՝ NEWSPRESS.am) մեջ պե՞տք է անդրադարձ լինի Լեռնային Ղարաբաղին։ Այսինքն՝ համապարփակ լուծո՞ւմ, թե՞, այնուամենայնիվ, Լեռնային Ղարաբաղի ժողովրդի իրավունքների, անվտանգության հետ կապված հարցերը պետք է առաջ ընթանան և հասցեագրվեն այլ տրամաբանությամբ։ Այս հարցում մենք որոշում չունենք։ Բայց սա չի նշանակում, որ դիրքորոշում չունենք։ Ես իմ դիրքորոշումը հայտնեցի հարցի առաջին մասում»,- ասաց Փաշինյանը։