Օգտակար բան չեմ տեսնում դրանցում. Փաշինյանը՝ Օսկանյանի հայտարարությունների մասին

Հայաստանի բոլոր արտաքին գործերի նախարարներն էլ կարող են նման հայտարարություններ անել, բայց եթե պետք էր բեկում մտցնել, ապա, կարծում եմ, որ պարոն Օսկանյանն իր պաշտոնավարման ընթացքում կարող էր այդ բեկումը մտցնել և մեր բոլորիս համար տեսանելի դարձնել։ Այս մասին այսօրվա ասուլիսում ասաց Նիկոլ Փաշինյանը, անդրադառնալով նախկին ԱԳ նախարար Վարդան Օսկանյանի կատարած հայտարարություններին։ 

Փաշինյանի խոսքով՝ Քննիչ հանձնաժողովում ինքը մի քանի ժամ տևած ելույթում մանրամասն նկարագրել ու գնահատականներ տվել է Վարդան Օսկանյանի պաշտոնավարման շրջանում Հայաստանի վարած քաղաքականությանն ու բանակցային գործընթացին, մասնավորապես՝ Մադրիդյան սկզբունքներին։ Իր գնահատականները դրանից չեն փոխվել։ 

«Ես ընդհանրապես բոլոր հայտարարություններին ուշադիր հետևում եմ, և եթե անկեղծ ասեմ՝ որևէ օգտակար բան չեմ տեսնում դրանցում, առնվազն այնպիսին, որ իրագործված չէ։ Օրինակ՝ Վարդան Օսկանյանը հայտարարում է, որ պետք է շեշտել այն հանգամանքը, որ Լեռնային Ղարաբաղը Խորհրդային Միության ժամանակ ունեցել է Ինքնավար մարզի կարգավիճակ։ Մինչև Վարդան Օսկանյանի հայտարարությունը, նույն Եվրամիության խորհրդի նախագահի հայտարարություններում, որոնք հաջորդել են իմ հանդիպումներին Ադրբեջանի նախագահի հետ, արձանագրվել է նախկին Լեռնային Ղարաբաղի Ինքնավար մարզի այդ եզրույթը։ Դա արձանագրվել է նաև վերջին հանդիպման ընթացքում։ Այսինքն՝ դա հրապարակային արձանագրված է մինչև Վարդան Օսկանյանի հայտարարությունը»,-նշեց Փաշինյանը։