Հիմա մեր տղաները ծառայել են Ադրբեջանո՞ւմ, թե՞ հայկական Արցախում․ զոհվածի հոր հարցը՝ Փաշինյանին

Նիկոլ Փաշինյանի ասուլիսի ժամանակ լրագրողը նշեց, որ իրենց խմբագրակազմը որոշել էր հարց ուղղել արցախցիների կողմից, սակայն վերջիններս հրաժարվել են որևէ հարց ուղղել Փաշինյանին։ Զերծ մնալով արցախցիների մեկնաբանությունները մեջբերելուց, լրագրողը Փաշինյանին 2 հարց ուղղեց 44-օրյա պատերազմում զոհված Դավիթ Զաքարյանի հոր՝ Աշոտ Զաքարյանի կողմից։

Առաջինը՝ ե՞րբ, ո՞ր պահից հասկացաք, որ Արցախն Ադրբեջան է և երկրորդ՝ երբ 2019թ-ի օգոստոսին հայտարարում էիք, որ Արցախը Հայաստան է և վերջ՝ ինչի՞ հիման վրա․ հիմա մեր տղաներն Ադրբեջանո՞ւմ են ծառայել, թե՞ հայկական Արցախում։

Արձագանքելով տղաների ծառայության հետ կապված՝ զոհվածի հոր հարցին, Փաշինյանը նկատեց, որ այն քննարկվել է նաև աշխատանքային հանդիպումների ընթացքում։

«Պետք է արձանագրենք, որ այդ որոշումը, թե տղաները որտեղ են ծառայելու՝ դժբախտաբար, թե բարեբախտաբար ե՛ս չեմ կայացրել։ Ինչ վերաբերում է իմ հայտարարությանը, ապա իմ ասածի տրամաբանությունը հետևյալն էր, որ տեսեք՝ Հայաստանը սենց բան պետք է հայտարարի, սենց բան պետք է հայտարարի ու եթե ինչ-որ բան չի ստանում կամ չի ստացել, դա էն պատճառով է, որ չի հայտարարել ուրեմն չի ուզում դա ունենալ»,- ասաց նա։

Անդրադառնալով հարցին՝ կապած Ադրբեջանի տարածքային ամբողջականության հետ, Փաշինյանը նշեց, թե Հայաստանը միշտ էլ ճանաչել է Ադրբեջանի տարածքային ամբողջականությունը։

«Աշխարհում չկա ու չի էլ եղել երկիր, որ ԼՂ-ն չի ճանաչել Ադրբեջանի մաս։ Այլ բան է, թե մենք այս իրողության հետ առերեսվել ենք, թե ոչ։ Ասել ենք՝ կապ չունի աշխարհը ճանաչում է, թե ոչ, բայց ինչ-որ պահի առերեսվել ենք կոնկրետ իրողության հետ»,- ասաց Փաշինյանը և հավելեց․ «Մեր խնդիրն այն է, որ մեր հարգարժան զինվորի հարգարժան ծնողի կողմից նման հարց չառաջանա»։