Ես պայծառատես չեմ, չեմ կարող ասել, թե երբ կլինի իշխանափոխություն․ Մամիջանյան

Ես պայծառատես չեմ։ Մի քանի անգամ ասել եմ դրա մասին, հիմա էլ կասեմ։  Հանրապետականը 2018թ․-ի ապրիլի 23-ից սկսած, ուժերի 100% լարումով, անում է ամեն ինչ, որպեսզի մեր երկիրն ունենա արժանապատիվ իշխանություն։ Այս մասին այսօր լրագրողների հետ կայացած ասուլիսի ժամանակ ասաց Ազգային ժողովի «Պատիվ ունեմ» խմբակցության ղեկավար Հայկ Մամիջանյանը՝ պատասխանելով այն հարցին՝ հնարավո՞ր է արդյոք իշխանափոխություն, թե՞ ոչ։ 

«Մենք այդպես ենք շարունակում անել և մի բան էլ՝ ավել։ Էնպես որ, խոստանալ, թե երբ կլինի իշխանափոխություն՝ ես չեմ կարող ասել։ Խոստանալ, որ դրա համար մենք ոչինչ չենք խնայի կարող եմ, բազմիցս խոստացել եմ և ևս մեկ անգամ խոստանում եմ։ Հանրապետականին ո՛չ իշխանություն է հետաքրքրում այս պահին, ո՛չ ինչ-որ պաշտոն, ո՛չ էլ՝ նմանօրինակ բան։ Մեզ անհրաժեշտ է իշխանափոխություն։ Մեզ անհրաժեշտ է, որպեսզի մենք չամաչենք Հայաստանը ներկայացնող մարդու պահվածքից։ Մեզ անհրաժեշտ է, որպեսզի Բաղրամյան 26-ից ատելության քարոզ չարվի։ Ադրբեջանի քարոզ, Հ1-ով՝ աթոռին նստած մարդու շուրթերից չարվի»,- նշեց Մամիջանյանը։