Կամ սրանք լրիվ ցնդել են, կամ հատուկ մարդկանց կատաղեցնում են․ Արման Աբովյանը՝ Սնուփ Դոգին Հայաստան բերելու համար միլիոնավոր դոլարներ ծախսելու մասին

Նախկին պատգամավոր Արման Աբովյանը ֆեյսբուքյան իր էջում անդրադարձել է Կառավարության կողմից ազդարարված՝ համաշխարհային աստղին Հայաստան հրավիրելու լուրին՝ Արցախի աղետալի բլոկադայի ֆոնին։

Աբովյանը մասնավորապես գրել է․

«...սրանք լրիվ ցնդել են, ուրեմն այս ահավոր նյարդային մթնոլորտում, երբ ամեն խոսքը կամ բառը պետք է լինի չափազանց զգուշավոր, այս իշխանությունը կրկին աչքի ընկավ «խելառ» վարքագիծով։

Պաշարված Արցախում մարդիկ սովի մատնված, ՀՀ տարածքները օկուպացված, Հայաստանը պատերազմի վտանգի առջև կանգնած, իսկ սրանք էլ մի մեծ շուխուռով, ուրախ֊ուրախ հայտարարվում են, որ բերում են Երևան ՍնուփԴոգին։ 

Ես դեմ չեմ, թող բերեն, բայց դա հայտարարել հենց այս օրերին... կամ սրանք լրիվ ցնդել են, կամ հատուկ մարդկանց կատաղեցնում են։

Լրիվ գիժ են, ամենավատ իմաստով։

Հ․Գ․ Ներողություն եմ խնդրում, բայց պտտվում է տեղեկություն, որ այդ միջոցառումը արժի 23․000․000 դոլար։ Պատերազմի մեջ գտնվող երկրում ծախսե՞լ այդպիսի գումարներ։ Չէ՛...սրանք չափերը կորցրած, աննորմալ մի երևույթ են»։

Հիշեցնենք, որ Նիկոլ Փաշինյանի ասուլիսում արցախցիների հարցերից ֆիասկոյի ենթարկվելուց հետո,  Հայաստանի կառավարությունը ցուցադրաբար, մեծ աղմուկով հումանիտար բեռ ուղարկեց մինչև Հակարիում ապօրինի տեղադրված անցակետ՝ քաջ գիտակցելով, որ Ադրբեջանը թույլ չի տալու այն հասցնել Արցախ․ պատճառաբանությունը հետևյալն է՝ Նիկոլ Փաշինյանն Արցախը ճանաչել է Ադրբեջանի կազմում և հետևաբար իրավունք չունի մեքենաներ մտցնելու Արցախ։ Եվ չնայած դրան՝ մի շարք միջազգային կազմակերպություններ և դրանց ներկայացուցիչներ դատապարտել են Ադրբեջանի այդ անմարդկային քայլը։