«․․․Որովհետև նախընտրական փուլ է, որովհետև Մարքրիտին պիտի լավ օժիտ տաս, որ կնության վերցնեն»․ Երևանի ավագանու անդամը՝ իշխանությանը

Ընկերներս յուրաքանչյուրն իր ոլորտում հաշվարկներ է անում, թե ինչեր կարելի էր անել ռեփերին հրավիրելու փողով: Բիզնեսի խթանում, գյուղատնտեսություն և այլն: Այս մասին ֆեյսբուքյան իր էջում գրել է Երևանի ավագանու անդամ Իզաբելլա Աբգարյանը։ 

«Հա, շատ բան կարելի էր անել: Բայց այս իշխանությունների առաջնահերթությունը, գործելաոճն ա «շոու-լենտ-նկար-վերնագիր»-ը: Սա է նրանց բանաձևը. անել բաներ, որոնք արագ դրական հույզեր կառաջացնեն կարճաժամկետը երկարաժամկետին գերադասող մեծամասնության մոտ:

Ճիշտ նույն ձևով էլ իմ ոլորտում հաշվարկում էի, թե ինչեր կարելի էր անել Երևանի համար այն միլիարդներով, որ կառավարությունը հատկացրեց Երևանում նախընտրական ասֆալտի էլ ավելի այլասերված ձևի համար՝ բակերի բարեկարգում, տանիքներ, շքամուտքեր ...

Կարելի կլիներ, օրինակ, աղբի տեսակավորումը արագ բարելավել՝ տեսակավորման արկղերը շատացնելով, որ ֆիկտիվ բնույթ չկրի, ինչպես այսօր է: Կարելի կլիներ, օրինակ, մանկապարտեզների տանիքներին արևային վահանակներ տեղադրել, որ էներգաարտադրող, ինքնաբավ դառնային, մի բան էլ հոսանք վաճառեին ու եկամուտ ունենային:

Կարելի կլիներ մի քանի շենք ուղղահայաց կանաչապատման համակարգով ապահովել, ինչը ոչ միայն զբոսաշրջիկները կնկարեին, այլ կնպաստեր Երևանի թիվ մեկ խնդրի՝ օդի որակի բարելավմանը:

Կարելի կլիներ Էրեբունի ամրոցի ցանկապատի և տարածքի տեսահսկողության հարցը լուծել, որ ով ասես չմտնի, ինչ ուզի անի:
Կարելի էր շատ բան անել:

Բայց ավելի շատ կարելի էր չտալ Գյումրու, Վանաձորի, Ալավերդիի և այլ՝ շատ ավելի սուղ բյուջե ունեցող համայնքների բնակիչների և տնտեսվարողների ջանքերով գոյացած գումարը նախընտրական բարեկարգմանը:

Ինձանից շատ Երևանը չսիրեք:

Բայց դա նորմալ չէ, որ գյումրեցու, սպիտակցու փողով Երևանում անում ես մի բան, ինչի կարիքը հենց այդ համայնքներն ունեն:

Առավել ևս, որ արվող աշխատանքների մի մասը համատիրության տիրույթում է, ոչ թե համայնքային բյուջեի: Երևանցիների մի մասին պատասխան ես տվել, թե «մենք կապ չունենք, գնա համատիրությունից պահանջիր տանիքիդ նորոգումը», մյուսինը նորոգում ես, որովհետև նախընտրական փուլ է, որովհետև Մարքրիտին պիտի լավ օժիտ տաս, որ կնության վերցնեն ...

«Երևացող՝ հույզեր կորզող մի բան, որը կարելի է նկարել, սելֆի անել, վերնագիր գրել ու տարածել»: Սա է տևական ժամանակ վարվող քաղաքականությունը:

Արտուշ պապիի տունը նորոգելու փիարի արև»: