«Մեկը մյուսին կասի` ինձ կընտրեն». Թումանյանի քաղաքապետ

Համայնքների խոշորացման ծրագրով Լոռու մարզի Թումանյանի տարածաշրջանի՝ Մոտկորի 6 համայնք` Քարինջը, Մարցը, Շամուտը, Լորուտը, Աթանը, Ահնիձորը միացան Թումանյան քաղաքին: Այս գյուղերի, ինչպես նաև Թումանյան քաղաքի բնակիչները, կընտրեն Թումանյանի քաղաքապետին: Առաջիկա ընտրությունները փետրվարի 14-ին են:

Համայնքի ղեկավարի պաշտոնում իրենց թեկնածությունն ի սկզբանե, առաջադրել էին 2 թեկնածու` գործող համայնքապետ Լեւոն Զավարյանը եւ Թումանյանի քաղաքապետարանի առաջին կարգի մասնագետ Էդգար Պետրոսյանը: Գործող քաղաքապետի 20-ամյա փորձի առաջ համայնքային աշխատողի 3-ամյա փորձառությունը չբավարարեց և նա, որպես «մատաղացու», ինքնաբացարկ հայտնեց:

«Այո, սա հենց այդ տարբերակն է… նախօրոք պայմանավորվում են, հետո նշանակված ժամկետում թեկնածուն ինքնաբացարկ է հայտնում»,- newspress.am-ի հետ զրույցում ասաց թիվ 31 ԸԸՀ նախագահ Վահան Վանյանը:

Էդգար Պետրոսյանը, սակայն, իրեն զոհ չի համարում: Նա հերքում է, որ ինքնաբացարկը պայմանավորված էր:

«Ուզեցի փորձել ուժերս, բայց հասկացա, որ ես թույլ եմ պարոն Զավարյանի կողքին, պետք է պարտվեմ ու ընտրապայքարի սկզբում նախընտրեցի դուրս գալ: Վախ կա մեջս, էլի»,-ասաց Պետրոսյանը:

ՀՀԿ-ական Պետրոսյանը տարակուսած նկատեց, որ ճնշումներ չեն եղել ոչ ժողովրդի, ոչ էլ հատկապես «մայր» կուսակցության կողմից:
«Որոշվեց, որ սենց պիտի լինի»,-ասաց Էդգար Պետրոսյանը` չմանրամսնելով, թե ում կողմից որոշվեց:

Իսկ Թումանյանի այժմյան քաղաքապետ Լեւոն Զավարյանն էլ նկատեց, որ կուսակցությունն այս գործում միջնորդ չէ և իրեն չի սատարում: Ասել է թե` չի ակնկալում գյուղապետերի աջակցությունը: Մինչդեռ, ընդունված ձև է, որ գյուղապետերը «խաթրով» դիմում են համագյուղացիներին` այս կամ այն թեկնածուին ընտրելու համար:

«Իմ հույսը իմ ժողովուրդն ա ու իրանց բարեկամները: Մեկը մյուսին կասի` ինձ կընտրեն»,-ասաց քաղաքապետը` հավելելով, որ «հատ-հատ» հանդիպելու է բոլորին: