Պետք է կարողանալ պատասխանատվություն կրել սեփական արարքների համար, այլ ոչ թե անվերջ մեղավորներ փնտրել. Զախարովան՝ Փաշինյանի վերջին հայտարարությունների մասին

Ռուսաստանի ԱԳՆ պաշտոնական ներկայացուցիչ Մարիա Զախարովան մեկնաբանել է վարչապետ Նիկոլ Փաշինյանի՝ իտալական La Repubblica թերթին տված հարցազրույցում արտահայտած մտքերը։

«Պետք է կարողանալ պատասխան տալ սեփական արարքների համար, այլ ոչ թե մեղավորներ փնտրել, և դա անել անվերջ՝ բոլոր առիթներով։ Հակառակ դեպքում սա նման է «վատ պարողի» մասին պատմությանը։ Պետք է պատասխանատվություն կրել և այն չբարդել ուրիշի վրա։ Սրանում է պետական-քաղաքական գործչի և իր երկրի, ազգային շահերի մասին չմտածող մարդու տարբերությունը»,- սեպտեմբերի 5-ին կայացած ճեպազրույցում ասաց Զախարովան։

Անդրադառնալով Հայաստանի կառավարության կողմից Հռոմի ստատուտը Ազգային ժողովի վավերացմանն ուղարկելու հարցին՝ ՌԴ ԱԳՆ ներկայացուցիչը նշեց․ «Մենք արդեն հայկական կողմից պարզաբանումներ ենք պահանջել այդ առիթով։ Մեր հետագա քայլերում կկողմնորոշվենք՝ ելնելով Երևանի պատասխանից»։

***

Նիկոլ Փաշինյանը իտալական La Repubblica թերթին տված հարցազրույցում ասել է. «Ռուսաստանի Դաշնության խաղաղապահ ուժերը չեն կատարում եռակողմ հայտարարությամբ իրենց ստանձնած առաքելությունը: Եվ սա լուրջ մտահոգության առիթ է: Եվ, ըստ էության, Լեռնային Ղարաբաղում ռուս խաղաղապահների ներկայության հիմնական նպատակներից մեկը հենց քաղաքացիական հասարակության, քաղաքացիական բնակչության անվտանգությունն է: Տվյալ դեպքում անվտանգությունը, այդ թվում՝ ազատ տեղաշարժի իրավունքը, չի ապահովվում, և դա իսկապես մտահոգիչ փաստ է»:

Փաշինյանը  նաև հայտարարել է, որ «Ռուսաստանը հենց իր կողմից ձեռնարկվող կամ չձեռնարկվող քայլերի բերումով ինքն է հեռանում տարածաշրջանից», ոչ թե Արևմուտքի դրդրմամբ Հայաստանն է միջոցներ ձեռնարկում Ռուսաստանին տարածաշրջանից հեռացնելու համար, ինչպես, ըստ Փաշինյանի՝ պնդում են Մոսկվայում։